Kalibo, Aklan – May 4,187 ka mangunguma nga magabaton it "rice assistance". Raya hay sa mga mangunguma ag andang pamilya nga apektado it "El Niño" Phenomenon. Raya ro pahayag ni Atty. Ronquillo C. Tolentino, nga chairman it Philippine Red Cross sa Aklan.
Kainang agahon, nag miting sanday Gov. Carlito S. Marquez nga imaw ro chairman sa Provincial Disaster Coordinating Council (PDCC) ro Department of Social Welfare and Development, ro municipal mayors it banwang Balete, Buruanga, Libacao ag Madalag.
Ro 4,187 nga mga mangunguma ag andang pamilya nga apektado it "El Niño Phenomenon hay maga baton it sangka sako tigsa tigsa nga bugas nga ga valor it P1,250.00 kada sako, raya ro hambae ni Ms. Arceli Pelayo, Philippine Red Cross Administrator sa Aklan.
Hinambae ni Atty. Tolentino nga sandig sa listahan it DSWD ro naga baton it ayuda hay 643 sa Balete, 311 sa Buruanga, 2,078 sa Libacao ag 1,155 sa Madalag.
Si Ms. Arceli Pelayo imaw maga coordinar sa mga "municipal mayors" it mga banwa nga nasambit kaibahan ko DSWD sa pagpanupod it "rice assistance". /MP
No comments:
Post a Comment