Sugilanon Ni Tita Linda

Ni Tita Linda Belayro

Si Aris Nga Purilon

Sa barangay Lumay, may sangka tawong kilaea it kadagayaan. Ro anang ngaean hay si Aris. Maski duro ro anang kakilaea, kilaea si Aris sa pagka purilon.

Maisot pa imaw hay mayad guid matorse it suguilanon. Maskin ro anang ama hay napasubo sa away bangod sa kasutil ni Aris. Tongod karon, owa it naga hampang kay Aris. Nahadluk sanda nga madaeahig sa kapilyuhan ni Aris.

Isaeang adlaw, samtang naga tikang imaw sa may daeanon, may hakita imaw nga mabahoe nga pala. Eain ro kolor ko rondaya nga pala. Madueaw nga mingko bueawan. Umandar eon man ro anang kapilyuhan. Nag usoy imaw it tanum nga dueaw ro itsura ag guin bayo nana ro unod. Nagdakop man imaw it paka. Ro duga hay guin hap-eas sa eawas it paka. Mas nagkutom ro kolor nga mingko bueawan man. Nag adto si Aris sa banwa. Pag abot sa banwa, guin baligya nana ro paka nga naga iti sinana it bueawan. Guin pakaon pa nana it dueaw ro paka. Ko una hay owa ro mga tawo ga pati. Ogaling kat pag iti it dueaw ko paka, nag aeagawan man sanda hasta guin bakae ro paka it limang libong piso.

Nag uli ro nakabakae sa andang baeay. Guindaea ko nagbakae ratong paka. Pag-abot sa anda, indi eon imaw makahueat. Bu-ot eon nana amat-amat nga mag iti it bueawan ro paka. Busa, ana lang guin pihak ro tiyan it paka. Owa man imaw it hakita nga bueawan kundi puro man lang tinai. Naakig it duro ro eaeaki. Ngani, guin usoy nana si Aris agod bawi-on ro anang limang libong pisong kwarta.

Tag pagkita nanda, naghambae si Aris, "Imo abi nga guin pihak ro paka busa, namatay. Dapat hueaton mo it kada agahon ag bantayan ro anang pag-iti." Nakalusot nga pahayag ni Aris. Owa it nahimo ro eaeaki tongod patay eon ro paka.

Ko gabii ngaron, sa anang katoeogon, hay nagdamgo si Aris. Nagpakita kana ro mabahoe nga paka. "Naeo-oy ako kimo ay basi patyon ka ko mga tawo, busa nga nag iti ako it bueawan, ogaling bukon it matuod nga may bueawan sa sueod ko akong tiyan", hambae it paka sa damgo ni Aris. Umpisa makaron hay punduhon mo eon ro imong kapilyuhan. Ko una hay nag bag-o mat-a si Aris, ogaling bumalik eon man ro anang pinaligos nga batasan ko pagtaliwan it pilang adlaw.

Pagkataliwan it pilang gabii, habatyagan ni Aris nga nagbahoe it amat-amat ro anang tiyan. Sa anang kahadluk, naghinyo imaw sa paka nga ibalik sa dati ro anang tiyan. Naeo-oy man kana ro paka ag halin kato, owa eon it Aris nga purilon. Nag bag-o eon si Aris.
Maga bag-o man baea kita paglapas it election sa May 10? /MP