Ni Tita Linda Belayro
Ro Hambog Nga Acacia
Ag Mapainubuson Nga Butong
May daywang mag amigong kahoy. Pareho sandang nagatubo sa kagueangan maeapit sa bibi it sapa. Guina pabugae ko Acacia ro anang madamoe ag mabahoe nga puno. Indi sinana mapatumba it maskin anong klasi ag kusog it bagyo. Sa kilid it sapa, hay ro mataas nga kabutongan mat-a.
Isaeang adlaw, haisipan nga sunlugon ko bugaeon nga Acacia ro Butong. "Nano abi amigong Butong ay ro imong eawas ngaron hay husto eamang nga ihampas it hangin. Tan awa baea ro akon nga mga braso ag puno, maskin anong hampas it hangin hay indi gid ako mapatumba", pabugae nga hambae ko Acacia. Nagdungok eamang ro pobreng Butong.
Ko isaeang gabii ngaron, may umabot nga mabaskog nga hangin. Maangan-angan, may eomagabong. Hakibot ro Butong kon ano rato tongod sa madueom ro gabi-i.
Pagkaaga, pag-bugtaw ko tanan, hakita ko Butong ro naka timbuwang nga Acacia.
"Amigong Acacia, nano ro natabo kimo?" pangutana it Butong. "Nagsaea guid ako amigo. Pag eaum ko hay masukean ko ro kabaskog ko hangin busa, owa ako magpaeampuwas. Ham-an ikaw nagatindog guihapon ag owa guid natumba?" ro sabat ag pangutana ko naga ugayong nga Acacia.
"Amigong Acacia, owa ko pag atubanga ro naga hagiyos nga hangin. Paghampak kakon hay nagpasunod sunod eamang ako ag pag eampuwas ko hangin hay tumindog eon man ako dayon", hambae ko Butong.
Leksyon: Indi kita magpabugae ko atong kusog, ko atong abilidad o manggad. Raya tanan hay may kaatubang ag may katapusan. Tuearon naton ro Butong, maniwang busa sarang itueod, hapayon it hangin nga naga pasunod-sunod eamang imaw tongod indi nana masarangan nga kontrahon ro pwersa it hangin.
Ro bagyo sa atong kabuhi hay umaeagi manlang. Pagtaliwan kara hay sarang eon man kitang makatindog. Daea ro pagtu-o ag pagsalig sa Makaako. Eain-eain nga pagsamit ro atong maagyan ogaling kon kita hay magpaka tatag kapares ko Butong, maga tindog eon man kita nga matsa owa man it natabo. /MP
No comments:
Post a Comment