Tita Linda Belayro
Si Garibaldy Ag Ro Higante
Saealigan nga bakero si Garibaldy. Tanan nga karnero hay guina salig kana. Kon pilang bilog ro anang boe-on sa kwadra hay imaw man ro anang guina balik kon hapon.
Isaeang adlaw, samtang guina bantayan nana ro mga karnero sa eati, may magueang nga nag agi kana. Nagpangayo kana it pagkaon ro magueang. Owa pa imaw nakakaon ko mga oras ngaron pero guin tao nana ro anang pagkaon sa magueang. Pagkatapos it kaon, nag pasaeamat kana ro magueang ag guin taw-an imaw it linabag nga abaka, tamboe ag wasay. Guina pagamit kana sa oras it nga kinahangean. Pagtaliwan it magueang, nag aeabot ro kaibahan nanang mga bakero. Nagsalakay eon man ro higante ag abo nga karnero ro anang habo-oe. Guin daea ko higante idto sa sueod ko anang yungib nga guina estaran. Nagdaeagan si Garibaldy sa yungib daea ro tatlong bagay nga tao it magueang.
"Kon matuod nga maisog ka, guwa ag iuli mo ro among mga karnero. Kon indi hay ako ro masueod ag bawi-on ro mga hayop", singgit ni Garibaldy. "Sin-o ka nga pangahas nga magsugo kakon? Kon eabaw pa ikaw kakon, iuli ko ro imong hayop. Magpakita ka anay it pruweba kakon", baeos man it higante.
"Hayra ro pamatuod. Kon mahaba ro imong buhok ag bungot, hayra ro akon". Ag guin itsa nana sa sueod ro linabag nga abaka. Hakibot ro higante. "Tan-awon ko kon man-o it eagko ro imong ngipon", hambae it higante.
"Hayra ro sambilog eamang ko akong ngipon". Pinilak nana ro saesaeon nga wasay. Hakibot man ro higante. Mas maeagko ag mataeum ro anang ngipon.
"Bueno, sa limog naton paagyon", hambae it higante. Guin tamboe nana ro anang tamboe ag nag daguob ro bilog nga kweba. Rikara hinadlukan ro higante. May mas pa gali nga mabahoe kana. Dungan nga nag gueowa ro mga karnero. Umpisa kato, owa eon it nabuhin sa mga karnero. Uwa man nag-pakita eon ro higante. /MP
No comments:
Post a Comment