Wednesday, May 26, 2010

Sugilanon Ni Tita Linda


Ni Tita Linda Belayro
Bueawan Nga Mga Trapo

Trapo ro pagtratar kanday Azon tongod owa it eabot nga ilo pa sa ina ag inaywan ko andang ama, guina alila pa ag guina pintasan ko anang tiya. Idto sanda nag estar sa kwadra kaibahan ko mga kanding ag baka pagkatapos it limpyo sa sueod it baeay hay nagapilak pa sanda it basura nga maeayo sa andang baeay. Nangin barkada nanda ro mga onga nga parang mga ati tongod sa kahigko ko andang eawas sa pag inukay it basura. Naeo-oy si Azon sa mga onga ag anang guina obrahan it mga payag-payag himo sa plastic. Idto naga katoeog ro mga onga ag anang guina daehan it pagkaon.


Isaeang adlaw, may mga pulis nga nag-abot agod gub-on ro mga payag-payag. Guin dipensahan sanda ni Azon. Nakipag away imaw sa mga pulis ogaling guindaea man guihapon sanda sa presento.

Mayad maghambae si Azon, tongod sa mga libro nga anang guina binasa sa baeay ko anang tiyo nga abogado. Napabilib ni Azon maskin ro hepe it pulisya. Nag abot ro tiyo nga abogado ni Azon. Hakita nana kon paano guin dipensahan ni Azon ro andang deretso bilang tawo. May naka-tambong nga isaeang ka negosyante ag humanga imaw kay Azon. Guin kangay nana ro grupo ni Azon ag guin paestar sa anang baeay nga paupahan.

Guin patun-an nana it abogasya si Azon. Naktapos ro daeaga ag makaron, naga serbisyo bilang abogado ko mga babaye ag onga nga guina abuso ag owa nakaagum it hustisya. /MP

No comments: