Sugilanon Ni Tita Linda

Ni Tita Linda Belayro

Unang Mangga

Inanod ro isaeang ka bote sa baybayon it Brgy. Dalagum, Langatan pag-katapos it pag eopok it bulkan. Maskin mabuhay eon nga nagtaliwan, owa pa makabalik sa normal ro pagpangabuhi sa rayang nasambit nga barangay. Abo pa ro mga pamilyang owa it baeay. Guina kueang pa sa pagkaon.

Samtang naga pina-ligos ro mga onga, may hakita sanda nga bote nga naga eotaw-eotaw. Bu-ot nanda nga buksan ro bote ogaling masyadong tig-a ro takup. Busa, hapilitan sanda nga basagon. Tag mabasag eon, golpeng may gumuwa nga aso. Pagkaanod ko aso, madasig mang tumambad ro isaeang ka gwapahon nga Ada.

Guin sumpa kuno imaw it isaeang ka Ogre nga abo ra kaila sa ada. Ogaling owa imaw pagbatuna. Busa, sa anang kaakig, guin sumpa imaw ag guin sueod sa bote. Bilang pag-pasaeamat sa mga onga, guin taw-an nanda kada isaea it singsing nga may tatlo nga pangabay nga mahimong itao. Nag oeoli ro mga onga ag nagpangayo sa andang singsing. Ro una ag pangaywa nandang pa-ngayo hay tanan pagkaon, baeay, ag ro paglibot sa bilog nga kalibutan.

Samtang iba mat-a ro pangayo ni Roger. Bu-ot nana nga mangin doktor sa pag pamueong ag mag patindog it hospital sa mga pobre. Tumaliwan ro mga dinag-on, nag asenso ro Brgy. Dalagum ogaling ro iba hay pigado man guihapon tongod naubos eang ro andang kwarta sa andang pagiging galante ag gastador.

Isaeang adlaw, naisipan ko diwata nga magbisita sa Brgy. Dalagum. Hakita nana nga abo pa guihapon nga mga pigado sa andang pangabuhi bisan may ospital eon ro doctor nga si Roger. Tongod sa anang kaeo-oy sa mga tawo, guin taw-an nana it bosoe ro mga tawo agud itanum. Pagtubo ko tanum hay nagbunga nga may korteng tagipusuon. Matam-is kun maeoto ro bungang prutas.

Raya hay simbolo ko pagpasaeamat ag pagpalangga ko diwata sa mga tawo. Rondaya ro unang mangga.

Halin kato, guin paabo ko mga taga Brgy. Dalagum rondayang kahoy agod indi nanda malipatan ro mabuot nga diwata. /MP