Sugilanon Ni Tita Linda

Ni Tita Linda Belayro

Ro Sawa Ag Si Pepito

Si Pepito hay isaeang ka solong onga it isaeang ka mangunguma. Sa pagtung-tong nana sa edad nga napueong dag-on, guin regaluhan imaw it tiyo nga ayam. Naging maeopot sanda ko anang hayopan. Dungan sanda nga naga kaon. Kaibahan man nana kon magkatoeog. Pagka taliwan it pilang dag-on, nagmiron si Pepito hasta nag asawa. Kaibahan pa guihapon sanda ko ayam. Pagkamatay pa ko anang ama, imaw ro nag iredar ko mga kaeanasan hasta imaw nga nag asawa, kabulig guid nana sa tanan nga oras ro palangga nana nga ayam.

Isaeang adlaw, nag adto si Pepito sa anang katamnan agod tanawon kon sarang eon nga ma kwartahan ro anang mga tanum. Nag abot man ro anang asawa nga parehas man ro andang tuyo ni Pepito. Owa naga eaum ro anang asawa nga una si Pepito. Ro anang paino-ino hay idto sa baeay si Pepito nga naga bantay sa andang onga.

Dali-dali imaw nga umuli nga may guina huptan nga kaakig ag kakueba sa anang dughan. Pag abot na sa andang baeay, hakita nana ro andang ayam nga naga eoko sa puertahan nga puno it dugo ro anang baba. Sumiklab ro kaakig sa anang dughan sa pagpati nga guin patay ko ayam ro andang onga. Sa owa it suko-suko, umadto imaw sa kusina ag bomo-oe it wasay ag tinigpas nana ro oeo it ayaw.

Pagsueod nana sa andang kwarto, hamu-ok nga naga katoeog sa duyan ro andang onga ag sa kilid hay may patay nga sawa nga naga paligos it dugalingong dugo. Nag abot man ro anang asawa. Hakita nana ro tanan. Duro guid ro anang kanugon sa anang ayam.

Sa saea nga paghusga ko anang asawa, naduea ro anang guina saligan ag palangga nga ayam. Nangayo kana it patawad ro anang asawa sa anang guin himo. Indi man nana mabasoe ro anang asawa tongod sa sobrang pagpalangga sa andang onga hay nahimo nana rondoyon. Ogaling sangka inosenteng ayam ro naduea nga abo pat-a kunta ro sarang ikabulig kanda. /MP