Sugilanon Ni Tita Linda

Ni Tita Linda Belayro

Titeris Ni Lola Inday

Maisot pa si Vina kat mamatay ro anang Lola Inday. Naubos it lustay ko anang mga tiyo ro andang na-e-ridar nga mga bagay kay Lola Inday. Tongod kamanghuran ro anang ama sa tatlong ka magmanghod, kana guin aywan ro eagi nga baeay. Ogaling guin bo-oe man ro mga eaging muwebles ag ibang igdaeapat. Ro habilin eonlang kanda hay mga eaging aparador nga may sueod nga eaging eambong ag ibang igdaeapat ko anang Lola.

Bisperas it paskwa eon. Nag uli nga masubo ro ama ni Vina. Owa guid imaw pagpahueama it cuarta ko anang tiyo agod ibakae it pang Noche Buena.

Samtang guina kaayad ni Vina ro mga igdaeapat ko anang Lola, nahueog rong eaging titires. Matsa may mga bato sa sueod ro titires. Guin buka ni Vina ag hakita nana ro mga papelon nga kwarta ag mga alahas nga antigo ko nang Lola. Nagdaeagan imaw sa anang ama ag guin pakita ro anang hatukiban.

Mabahoe nga paskwa ro guin regalo ko anang Lola kanda. Naga hueat guid lang it tama nga tiyempo, sa tiyempo nga sanda hay maga kinahangean.

Umpisa kato, owa eon say Vina naga kalisod eabi guid kon oras it kapaskwahan. Guin gamit nanda sa mayad ro regalo ko anang Lola ag owa nanda guina kalipati nga mag panupod it pamaskwa sa andang isig katawo. Sa rondayang paagi, hadumduman nanda ro regalo ko andang Lola nga guina balik man nanda sa tawo agod makaagum it kalipay kada mag-abot ro paskwa. /MP