Sugilanon Ni Tita Linda

Ni Tita Linda Belayro

Eaging Baeahugan

Si Beryong hay mahugod magkorte it mga bagay halin sa kahoy. Naka obra imaw it mga pispis, isda ag mga titires. Abo guid nga naga bakae ko anang obra sa tindahan maskin owa pa it pintura. Sa anang pandayan, may habilin pa nga kahoy nga owa pa haubra si Beryong. Hapaino-inohan nana nga obrahon nga baeahugan it mga hayopan. Pagka human, anang guin daea raya sa tindahan, ogaling owa guid it nagbakae. Ana eon lang nga guin oli ag guintago sa anang kamalig.

Ko gabi-i ngaron, may daywang ka mag asawa nga halin pa sa ibang lugar. Sige ro andang inusoy it baeay nga madayunan tongod manog onga ro babaye. Ogaling owa guid kanda it nagbaton nga tag-baeay. Nakaabot eon sanda sa isaeang ka kamalig. Nag desisyon nga una sanda magpataliwan it gabi-i.

Owa pa maagahi, nag onga ro babaye, ag kinahangean nga may maeogban ro eapsag tongod maeoya pa ro babaye. Hakita nanda ro naga sandig nga baeahugan. Guin butangan ko tatay it mga dagami it paeay ag mga dahon ratong baeahugan, ag guin hapinan it hamo. Raya ro nangin kuna it eapsag.

Manami ro katoeogon ni Beryong hasta inuhaw imaw. Inabot it kauhaw si Beryong samtang naga katoeog. Bumangon imaw agod mag inom it tubi. Hakita nana nga mahayag ro baeahugan. Nagling-ling imaw ag hakita nana ro hitsura ko eapsag nga imaw si Niño Hesus. Ag ro eaeaki ag babaye hay si Maria ag Jose man. Nag eohod imaw ag nagpasaeamat tongod hakita nana ro pagkatawo ko atong manunubos. Pagkaaga, owa eon ro Sagrada Pamilya. Habilin eon lang ro eaging baeahugan.

Mas bulahan ro eaging baeahugan tongod maskin owa imaw guin inato it mga tawo, mabahoe ro anang papel ko mga oras ngaron. Imaw ro guin eogban ko atong manunubos. Bulahan man ro mga kubos tongod sanda hay guin bayaw sa mata it Diyos. /MP