Sugilanon Ni Tita Linda

Ni Tita Linda Belayro

Ro Daywang Ka Mga
Bilin Ni Tatay

May isaeang ka binatilyo nga natak-an eon sa andang kapobrehon. Isaeang adlaw, nag eaong imaw sa anang ama nga usoyon nana ro andang swerte sa liwan. Nagpasugot ro anang ama, busa, guin pabaeonan imaw it pilang ka tinapay ag pilang pesos nga kwarta. Sa anang pag eakbay, nakaabot imaw sa isaeang ka kaharian. Sa anang pag pangutana, hasayran nana nga ro hari nanda hay idto sa kagueangan naga pangayam ag naga usoy it mga dahon agud iboeong sa anang asawa nga naga masakit.

Nag adto man imaw idto sa kagueangan. Tama guid ro anang pag-abot tongod naga usoy gali ro hari it manog bantay sa andang pagkaon. Abo eon nga guin bo-oe ro hari nga manog bantay ogaling kueang pirme ro haabutan nga pagkaon tongod guina buhinan ko bantay kon imaw gutumon.

Nagpasugot imaw nga bantayan ro pagkaon. Pag abot it udto ro adlaw, naga umpisa eon it batyag it gutom ro binatilyo. Ubos eon ro anang baeon nga tinapay. Owa man it makakita kon ingkaso magbo-oe imaw it sangkiri sa kaabu-abo ngaron nga pagkaon. Apang hadum-duman nana ro bilin ko anang ama. Indi ka guid magpadaea-daea sa kaibug.

Magpangayo ka kon guina gutom. Busa, guin tiis nana ro anang kagutumon hasta nag abot ro grupo it hari. Guin tan-aw it hari ro mga pagkaon. Sayod nana nga owa it buhin maskin sangkiri ro anang pagkaon. Guin dayaw nana ro binatilyo. Nalipay gid ro hari tongod nga hakita nana ro tawong anang masaligan. Guindaea imaw sa palasyo.

Pag abot nanda, hakita nana ro gwapa nga onga nga prinsesa it hari. Abo nga naga pangasawa nga mga prinsipe ag duke sa prinsesa ogaling indi sanda maagahan sa kwarto nga guina eogban it prinsesa. Tanan hay naga kaeamatay. Naghambae ro hari nga kon sin-o ro makatakod mag eobog it sang gabii sa kwarto it prinsesa hay anang taw-an it manggad ag ipakasae pa sa prinsesa.

Tongod naga usoy imaw ko anang swerte, nag presentar ro binatilyo nga samitan nana nga imaw ro matueog sa kwarto it prinsesa. Parabil imaw mag adto sa kwarto it prinsesa, nagsueod anay imaw sa isaeang ka kwarto ag naghapa nga naga dupa sa pagpangamuyo. Guin pangayo nana sa Balaan nga Espiritu nga buligan guid imaw. Guin salig nana sa Diyos ro anang kaugalingon.

Pag abot it tungang gabii, hamu-ok nga naga katueog ro prinsesa, nagguwa ro isaeang ka anino halin sa naga lisik nga mata it tigre nga dekorasyon sa ding-ding. Owa guid mag katoeog ro binatilyo. Hadumduman nana ro bilin ko anang ama. "Mag andam sa traidor nga kaaway nga naga atake sa imong katueogon". Guin pahaum nana ro anang baeon nga pinutoe.

Kat lugar nga eampasan nana ro kaaway, haunahan imaw ko Balaan Nga Espiritu nga imaw ro umatubang sa maeain nga espiritu. Kumaripas it guwa ro maeain nga espiritu ag eomohod eon man ro binatilyo sa pag pasaeamat sa Diyos. Pagkaaga, pagbukas it pwertahan, hauna nga gumuwa ro prinsesa. Guin hakos imaw ko hari ag reyna. Pagsueod ko hari sa kwarto, matsa owa guid it natabo. Owa it nag kaeabasag ag nagkalhit nga mga igdaeapat. Sa binit idto pa ro binatilyo naga katoeog tongod owa imaw it toeog ko sang gabi-i.

Pag bugtaw it binatilyo, guin lamano imaw it hari sa anang kaisog. Owa it eabot nga masaligan pa imaw, hay maisog pa. Busa, husto guid ro guin usoy ko hari para sa anang onga nga prinsesa. Owa magbuhay, guin kasae sanda ag tongod sa maeoya eon ro hari, guin saylo kana ro korona. Guin dumaeahan it bag-ong Haring Bantolo ro kaharian it may kaaeam ag kaisog. Busa, owa guid it nagsamit o nag pa iming-iming nga eopigon ro anang kaharian. /MP