Sugilanon Ni Tita Linda

Ni Tita Linda Belayro

Halipatan Ni Santa Klaus

Kumpleto eon ro listahan. Sa lugar ni Santa Klaus, madasig ro pag obra ko tanan. Kinahangean abi nga sa bisperas it paskwa, ikapanupod eon ro tanan nga mga regalo sa mga onga.

Pagbagting it alas dose, nag eopad sa kahanginan ro karwahe ni Santa nga guina guyod ko mga usa sa pagpanguna ni Rudolph. Sa bilog nga sang gabie it Disyembre 24, nagpanupod ro tanan it mga regalo. Ogaling sa pagkakibot ko tanan nga mga usa, may sangka numero nga owa maghayag. Sambilog nga onga sa Pilipinas ro owa mataw-i it regalo.

Sa pagtan-aw sa milagrosong baso ni Santa, si Marites hay owa sa andang baeay ko mga oras ngaron. Idto imaw naga sag-ob it tubi sa bubon tongod masakit ro anang ina ag kinahangean nga agahon pa imaw magtug-on para sa andang pamahaw sa adlaw it kapaskwahan. Nag taeangis ro mga usa ni Santa. Naeo-oy sanda kay Marites tongod indi eon sanda maka balik tongod bawae nga hikita sanda it mga tawo.

Nag dogaling si Rudolph nga imaw ro mabalik ag mag pakuno-kuno nga tawo agod ita-o kay Marites ro anang paskwa ko agahon ngaron. Natamaan man nga ko agahon ngaron, nag gueowa ro mga onga agod ipakita ro andang mga regalo. Masubo guid si Marites tongod imaw eamang ro owa maka- baton. Maangan-angan, may nagpanuktok. Pag eaum ni Marites hay naga pamaskwa. Paalin ay owa guid sanda it pahaum?

Isaeang ka magueang nga naka biste it gulanit ro nagpangayo kana it pagkaon. Nag pangayo it pasensya si Marites. Maskin guin pakaon nana ko anang bag-ong tug-on nga humay. Pagkatapos it kaon, guin taw-an it puti nga puyo si Marites. Sugo it magueang, pangayu-on nana sa puyo kon ano ro anang naila-an ag gamiton eamang sa kamaeayran.

Amat-amat nga nag asenso sanday Marites. Owa guid it nakasayod nga ko kaadlawan it paskwa, may isaeang ka regalo nga eabaw sa tanan rong guin baton ni Marites. Kada paskwa, tanan ro mga tawo sa barangay hay naga linya sa baeay ni Marites agod magbaton it regalo. Rondaya ro pana-ad ni Marites nga kada paskwa sa pagsunod sa sugo it magueang nga gamiton eamang sa kamaeayran ro regalo kana. /MP