Sugilanon Ni Tita Linda

Ni Tita Linda Belayro


Ro Amigo Ni Nitoy

Eapsag pa eamang si Nitoy kat mamatay ro anang ina. Busa kay Lolo Binong imaw nagbahoe. Mangingisda si Lolo Binong.
Isaeang adlaw, nagmasakit si Nitoy. Tongod owa sanda it kwarta, owa imaw madaea sa ospital. Idto imaw sa arbularyo igpabueong. Tongod sa anang pag masakit, nagtag-ud ro anang siki. Bangud sa anang kapansanan, naapektuhan ro anang pag – eskwela. Malisod imaw magpanaw maskin may saklay pa bangud maeayo ro andang baeay sa eskwelahan. Waeong dag-on eon ro anang edad ka’t mag-umpisa imaw it pagtuon, pag adto sa eskwelahan. Kon amat, guina sunlog pa imaw sa andang eskwelahan, ogaling owa guid gaakig si Nitoy. Perming ulihi imaw kon mag-abot sa andang baeay tongod sa kahinay kon imaw magtikang.
Isaeang hapon, may onga nga eaeaki, mga an-um nga dag-on rong pang edaron, nga nag dungan kana. Nag pakilaea: "Ako si Niño." Pagpakilaea ko onga. "Ikaw, ano ro imong pangaean?" "Ako si Nitoy. Ham-an it kakon ka guid nagdungan ay mahinay ako magpanaw?" "Bu-ot ko ikaw tongod naga-usoy ako it mabuot nga onga." Naka-abot sanda sa baeay ni Nitoy nga owa mapan-uhi. Gustong ipakilaea nana si Niño sa anang Lolo ogaling golping naduea ro onga.
Pagka-aga nagkita eon man sanda. Nagsunggod si Nitoy tongod gusto kunta nanang ipakilaea imaw kay Lolo Binong. Nagsabat si Niño nga "bukon pa it oras."
Naghinampang sanda sa baybayon. Malipayon guid si Nitoy nga mingko owa nakabatyag it kaga-oy. Napan-uhan nanda nga madueom eon. Mag-sig uli man sanda nga daywa. Halin kato kada hapon, nagakita sanda ni Niño sa baybayon para maghampang. Pero ko hapon ngaron, owa mag abot si Nitoy. Guinbisitahan imaw ni Niño. Sadyaan guid ro anang biste. Tongod owa sanday Nitoy it siya, sa saeog eon lang magpungko si Niño. Hakita ni Niño nga kamote rong pamahaw ag ilabas nanday Nitoy. "Kamote eang ro inyong guina kaon?," pangutana ni Niño. "Owa abi it dakop nga isda si Lolo, ngani owa kami it ibakae it pagkaon". Hambae man ni Nitoy.
"Umpisa hin-aga, may isda eon perming dakop ro imong Lolo. May regalo pa ako kimo. birthday ko makaron". "Ham-an it ikaw rong nagaregalo?" "Manggaranon abi ro akong ama sa eangit." Pinasueat si Nitoy ko anang mga handum. Pagkatapos guin dawat nana kay Niño. "Hueaton ko ikaw hin-aga sa simbahan", bilin ni Niño.
Guinsay-say ni Nitoy sa anang Lolo rong bilin ni Niño. Pagka-aga, nagsimba rong mag-Lolo. Naka-abot guid man sanda sa katapusang misa.
Guin-usoy ni Nitoy si Niño. Sa altar it simbahan nana hikita si Niño. "Lolo, hayron si Niño!" Guinsaway imaw ni Lolo Binong. Abô nga tawo rong hakibot sa singgit ni Nitoy. "Niño, iya eon ako". Humangin it mabaskog. Inapok ro saklay ni Nitoy. Nakatindog si Nitoy. Pati rong kura paruko hay hakibot man sa natabo. Guinpaeapitan kong pari ro rebulto. May hakita imaw nga papel sa anang alima. Nakasueat rong mga handum ni Nitoy. Abô nga nagtangis sa andang nasaksihan. Isaeang ka milagro ro natabu. Abo man nga nag hinoe-soe ko andang kasae-anan. Kunta sanda man rong milagruhan it Santo Niño. /MP mailto:madyaas_pen@yahoo.com