Bermuda Triangle
Sa may Bahamas, abô nga mga eroplano nga naga kabag-bag ag mga barkong naga kaduea. Indi sanda makabalik sa gin halinan.
Rong mga nasyon hay naga kabaeaka. Raya man lang rong rota nga eaktod para sa mga barko, agud madali maka abut sa gina adtunan. Rayun man ro aeagyan it mga eroplano. Rong mga maeagko nga nasyon kapares kong Russia, Amerika, Japan ag Great Britain hay nagboeoligan. Nag imbento sanda it isaeang ka barko nga puno it armas ag radar agud mabantayan idto sa ibabaw ro naga eayag nga barko.
Sa royong lugar pageapit, guina higop ro barko paidaeum. Nagbukas rong isaeang ka trayangolo nga matsa puertahan ag guin tueon rong mabahoe nga barko. Kompleto sa idauem, kapareho it isaeang ka komyunidad. Ro mga tawo hay may mga himbis ag mataeawis ro andang doeonggan. Mabakod ro andang eawas tongod sa andang pagkaon nga agar-agar ag eana halin sa pating.
Guin bihag rong mga tripulante ag guin daea sa pinaka puno nga isaeang ka magueang nga eaeaki. Sa pageapit it "monitor" sa ibabaw, nakilaea nga si Dr. Sternberg gali, isaeang ka siyentista nga Aleman nga naduea it mga 50 años eon nga nagtaliwan. Dati imaw nga, siyentipiko nga guin hibaygan ro anang imbensyon. Guin sumpa nana nga himo-on nana rong tanan agod makabaeos imaw sa nag intremis kana. Umpisa kato, naduea imaw ag owa masayori kon siin mag-adto. Lipod sa tanan, guin tipon nana ro anang mga kagamitan ag kaibahan ko anang mga sumueonod, nagpatindog imaw it laboratoryo sa idaeum it dagat. Amat-amat nga nag-abo ro anang tawohan nga puro mangingisda ag tripulante sa barko nga andang nahigop.
Bilang bihag nga tawohan, guin tun-an sanda it mga hilikuton. May bantay sa kada pamusod it komunidad. Rong naga plano nga mag ea-as hay guinapakaon sa piranha ag pating nga alila ni Dr. Sternberg.
Guin planuhan kon paalin mauesob rong anang laboratoryo. Paagi sa kamera nga naka kabit sa kada tripulante, guin planuhan nga eroplano rong masalakay. Guin paandaman ro mga preso nga magpaeayo sa "target area". Guin paguwa ni Dr. Sternberg ro anang mga kanyon. Pagkakita nga nagbuka rong puertahan, tinira it "guided missiles" rong laboratoryo. Wasak tanan ro kutob sa natamaan. Guin bantayan man rong sekretong aeagyan. Kaibahan ni Dr. Sternberg, nadakpan rong tanan. Guin presentar sanda sa media. Bilog nga kalibutan hay naga tan-aw sa mga telebisyon. Umpisa sa rayang incidente, owa eon it nadudueang barko ag eroplano.
Makaron nangin "tourist attraction" rong Bermuda Triangle. Guin kaayad it gobierno ag guin bantayan. Rong sekretong aeagyan rong guina-agyan it mga turista sa idaeom it dagat. Kapares it isaeang ka "underwater aquarium" nga makita ro mga sari-saring isda ag mga pating.
Makaron, isaea eon lang ka estorya rong Bermuda Triangle, ogaling rong mga tripulante nga bihag sa mabuhay eon nga dinag-on sa idaeom it dagat hay indi gid nanda malipatan rong makangingidlis nga hitabo sa andang kabuhi. /MP mailto:madyaas_pen@yahoo.com
No comments:
Post a Comment