Sugilanon Ni Tita Linda

Tita Linda Belayro

Pagpamatu-od Sa Ka-aeam Ni Haring Solomon

Rong ka-aeam ni Haring Solomon hay eotaw sa bug-us nga tanan nga pamusod it kalibutan. Guina dayo ro anang ka-aeam ko durong tawo halin sa iba – ibang nasyon. Nagadaea it mga regalo tanan rong naga bisita kana. Naga padugang raya nga mga dueot sa kaban it kaharian. Ro anang kaaeam hay gin pa arag kana it mahae nga Diyos bangud ana nga guin pangayo agud makabulig kana sa anang pagdumaea sa kaharian.
Isaeang ka pag pamatuod rong natabo. May isaeang ka ina nga nagdangup kana. Suno sa pag pahayag ko ina, guin bo-oe kuno kana ro anang bag-ong onga nga eapsag ag guin baylohan it patay. Sa anang pagpati, bukon it ana ratong patay nga eapsag tongod sa anang sugid, guin patawag ratong babaye nga guinpabangdan nga nagtakaw ko eapsag.
Suno sa deklarasyon ko rayang babaye, nagkinatoeog tana imaw tag namatay ro onga. Bangud sa anang kapabayaan namatay ro onga. Indi igta-o ko babayeng gina pabangdang nagtakaw ko onga. Hanu-onan nga kadungan abi nga nag-onga sanda nga daywa. Komo indi masayran kon sin-o rong minatuod nga ina, guin sugo ni Haring Solomon rong soldado nga mag bo-oe it sanduko.
Dayon, guin sugo man it hari nga ibutang ro eapsag sa ibabaw it lamesa agud hueayon pa agi sa pagpihak. "Pareho nga may inyo", hambae ni Haring Solomon. Nag pasugot rong sambilog nga nanay nga naga koe-koe it onga. Indi magsugot ro sambilog. Ana lang ita-o rong anang onga indi eang pag pihakon.
"Ita-o rong eapsag sa tunay nga tag-ana. Rong tunay nga ina owa naila nga mapatay ro anang dogalingong onga, "sentensya ni Haring Solomon. Owa maka balibad rong ina nga naga koe-koe it eapsag. Guin ta-o nana rong eapsag sa minatuod nga ina. Abong nagdayaw sa ka-aeam ni Haring Solomon. Isaea eamang ra sa mga pagpamatuod sa ka-aeam ni Haring Solomon nga indi matupungan. /MP mailto:madyaas_pen@yahoo.com