Primerong Alibang-bang
Sa isaeang maeayo nga lugar, maeapit sa Kastilyo it Borbon, may isaeang ka nanay nga may tatlong ka mga onga nga dalagita nga naga-estar. Mahugod rong nanay. Tanan nga trabaho, anang guina obra para mapakaon rong tatlong ka mga onga ag maka kita it kwarta para sa iba pang kinahangean. Guina paaragan nana ro anang mga onga, guina paeambungan it sadyaan agud maka-asawa it may una-ona o manggaranon. Owa man nana guina paobraha rayang mga dalagita ay basi masamad ro andang mga panit ag oyahon. Kon may gina obra gid man hay tag ma ugan manlang.
Ogaling maskin nanong kahugod ag pag-paarag sa anang mga onga, indi gid sanda makadaug sa mga onga it manggaranon, mga kon sin-ong perming guina kangay sa kasadyahan sa palasyo ag sa mataas nga sociedad. Matsa madali ro adlaw, pero mahaba eon ro nag taliwan. Omabot rong tiempo nga nag gueang eon rong Nanay hasta nga nag masakit. Owa guid it nakapangasawa nga manggaranon sa anang mga onga.
Ka’t indi eon masunod ro andang kapritso, nagdisider rong tatlong dalagita nga magpanaw sa ibang lugar agod magpasimpaead, basi makakita it gwapo ag may una-ona. Nagputos sanda ko andang mga eambong para magpanaw. Guin hawiran sanda ko andang ina. Nag hinyo kanda nga indi imaw pag-aywan, kapin ay maeoya eon.
Nabati-an kong sangka engkantada ro hinyo it andang ina. Naeo-oy ro engkanto. Busa nag himo it pa agi agud mapunggan ro pagpanaw ko tatlo. Owa nakaguwa sa kurae rong tatlo. Guin sumpa sanda nga mangin insekto nga may pakpak nga may naga kaeain-eain ag mayad-ayad nga kolor. Nagpalibot-libot ro tatlong ka daeaga sa andang baeay nga nangin kiwa-kiwa ag dayon naghapon sa mga bueak.
Halin kato hasta makaron, kon makakita kita it alibang-bang nga may eain-eain it kolor nga nagalibot-libot sa mga kabueakan, madumduman naton rong tatlong ka dalagita nga owa it kabaeaslan sa pagsakripisyo ko andang ina. /MP mailto:madyaas_pen@yahoo.com
No comments:
Post a Comment