Sugilanon Ni Tita Linda

Ni Tita Linda Belayro

Ro Titiris Ni Sakira

Manogpamueot it basura si Sakira. Kon owa it klase, kaibahan ko ibang mga onga sa tambakan it basura sanda naga adto daea ro andang mga sako. Ko isaeang agahon, masakit ro ina ni Sakira. Owa guid sanda it kwarta agod ibakae it boeong. Naubos eon ro andang kabakeanan ko pilang adlaw. Ro anang mga igmanghod nga si Bandoy hay naga pangayo it pagkaon. Permi eon lang nga noodles ro andang pagkaon.
Nag eaong imaw kay nanay nana agod mag-osoy it kwarta. Nanaog imaw nga mag adto sa tambakan. Maangan-angan, nag-agi ro trak it basura. Dayon nga daeagan ko mga onga paadto sa tambakan. Sigeng aeagawan ko mga onga sa mga bote, plastic ag saesaeon. May hakita nga isaeang ka titiris si Sakira nga owa guina inatuha ko ibang mga onga. Kat abo eon ro anang hapueot nga bote ag mga karton, guindaea nana sa junk shop agod ibaligya. Nagbakae imaw it noodles ag sang kilong bugas. Dayon guin oli agod eahaon. Naka-kaon ro anang ina ag igmanghod.
Guin bo-oe dayon nana ro anang titiris ag guin limpyuhan. Sam-tang guina sudlay nana ro buhok ko titiris, hapan-uhan nanang may naga kaeog sa sueod. Guin tas-tas nana ro eambong ko titiris. Idto nakatahi ro mga papilon nga kwarta nga linibo. Nahueog man ro guin putos nga mga alahas nga singsing, aritos ag kulintas. Anang guin-daea sa anang ina.
Nag eohod ro anang ina sa pagpasaeamat sa grasya nga nag-abot kanda. Ogaling una man ro kahadlok tongod owa nanda masayri kon sin-o ro tag-ana kara. Guin daea ni Sakira ro anang ina sa ospital ag nagbakae it mga kina hangeanon sa baeay. Nagbakae man sanda it sangkiri nga groserya agod ibaligya rona sa andang lugar. Owa guid it nakapan-o sa andang pagpangabuhi kon may nag dugang tongod owa nanda guin gasto tanan ro mga alahas ag kwarta nga hakita.
Isaeang adlaw, may pumundo nga itom nga auto sa printe ko andang baraka. May nanaog nga daywang ka tawo nga naka antipara it itom. Nangu-tana sanda kon may nakapoeot it titiris nga eagi una sa andang lugar. Haum nanda nga bakeon ratong titiris. Ka’t owa man sanda it habo-oe nga impormasyon, umuli lang sanda. Amat-amat nga guinabakae ni Sakira ag ko anang ina ratong kwarta it mga igdaeapat ogaling ro mga alahas, owa guid nanda igbaligya.
Sa pagtaliwan it mga inadlaw, naduea ro titiris. Nagpaeayo ro titiris tongod suno sa mga taga runa, guin gamit kunta it mga sindikato ratong titiris sa illegal nga mga transaksyon, ogaling hapilak ro titiris ag haadto sa mga basura tongod owa masayuri ko ibang miyembro it sindikato nga ro titiris gali hay may mga sekreto. Para malikaw ro pamilya sa maeain nga katuyu-an it mga sindikato, nag paeayo eon lang ro titiris nga owa masayuri.
Naduea eon sa paino-ino nanday Sakira ratong titiris. Mayad eon ro andang pagpangabuhi. Pagtaliwan it pilang domingo, may nagbisita kanda nga isaeang ka dalagita nga ro anang biste hay kapares ko ratong titiris. Nagpakilaea imaw nga imaw ratong titiris ag nagpanaw nga owa nageaong bangod basi madakpan it mga tawo. Ka’t idto eon imaw sa ibang lugar, hakita imaw it isaeang ka engkantada it kagueangan. Naeo-oy kana ratong Ada ag guintaw-an imaw it kabuhi. Ogaling gamiton nana sa kamaeayran. Hadumduman nana ro pamilya ni Sakira. Paagi sa gahum it Ada, guindaea imaw idto sa may tambakan ag idto sa baeay ni Sakira imaw umadto. Nalipay it duro sanday Sakira. Guin baton imaw ag guin pakilaea nga igkampod nana. Hawig ro andang hitsura ngani guin hingaeanan imaw kay Samira.
Halin kato, malipayon nga nagpangabuhi sanday Sakira ag Samira. Nagmayad man ro anang ina ag owa sanda nagakalipat sa pagsimba ag pagbulig sa mga tawo. Bu-ot man nanda nga makasamit ro ibang tawo ko grasya ng habaton sa Diyos nga maka ako. /MP