Tita Linda Belayro
Ro Ogre Ag Ro Prinsesa
May isaeang ka prinsesa nga masyadong mapili. Bu-ot eon ko hari nga maka-apo ogaling owa guid it hapili-an ro prinsesa sa mga naga pangasawa kana. Bisan may edad eon imaw hay mapili guihapon.
May isaeang ka ogre nga masyadong kaeaw-ay nga naila it duro sa prinsesa. May alila ra imaw nga mabahoe nga pispis. Guin papaniiran ko ogre kon ano ag siin naga adto ro prinsesa kada agahon. Kada adlaw, parabil magsubat ro adlaw, makit-an nga naga pamasyar ro prinsesa sa anang hardin. Naga kotoe imaw it mga bueak nga guina butang nana sa anang plorera.
Ko isaeang agahon ngaron, may sangka sadyaan nga alibang-bang ro naghapon sa anang kabueakan. Naingganyo ro prinsesa nga dakpon ro alibang-bang agod ibutang sa hawla. Guin eagas ko prinsesa ro alibang-bang hasta naka-abot imaw sa liwan it palasyo. Ko mga oras ngaron hatama-an nga una ro itom nga karwahe it ogre nga naga hueat sa guwa. Pa-on gali ratong alibang-bang agod eagson it prinsesa hasta imaw maka guwa it palasyo.
Sa madaling hambae, guin pasakay ro prinsesa sa karwahe ag guin daea ko ogre ro prinsesa sakay sa itom nga karwahe paadto sa mataas nga torre nga owa it hagdan. Kon magbisita kana ro ogre hay naga baylo ra bilang pispis agud makita eamang ro prinsesa. Ro pispis man ro naga daea it pagkaon sa prinsesa.
Samtang mingko naka preso ro prinsesa, nag paino-ino imaw kon paano makatakas. Nangayo imaw sa pispis it mga dahon it baki-baki agod obrahon nga taeagbasan. Busa, adlaw-adlaw, kon magdaea it pagkaon ro pispis, hay may daea ra nga mga baki-baki. Dayon nga guina obra ko prinsesa nga eobid. Idto guina tago sa idaeum it katre. Ka’t mahaba eon ro eobid, guin butangan nana it pamato agod masayuran kon makaabot eon sa eogta ro eobid.
Ka’t habatyagan nana nga nakaabot eon sa eogta ro punta ko eobid, mabakas imaw nga nanaog ag magdinaeagan. Nakaabot imaw sa isaeang ka baeay nga owa it tawo. May pagkaon nga naka hakid sa lamesa. Sa sobra nana nga kagutom, nagpaayaw-ayaw guid imaw it kaon hasta hakatoeogan.
Pagmuk-eat ko anang mga mata, owa imaw it hakita kundi ro mga unano nga naga tan-aw kana. Naghinyo imaw nga una anay imaw maestar ag maga serbe bilang kabulig. Nagpasugot ro mga unano. Tumaliwan ro pilang buean, nag eaong imaw nga mauli eon sa andang palasyo. Tongod sa anang kahugod, guin taw-an imaw ko mga unano it panyo nga sarang magamit kon bu-ot nana nga maduea imaw o kundi may anang pangayuon hay sarang ikata-o kana it panyo. Nagpanaw imaw. Agod indi masundan it ogre, nag balhin imaw nga isaeang ka manog pakalimos hasta nakaabot sa palasyo. Pag-abot sa palasyo, nag-eaong imaw sa guardiya agod masueod ogaling owa imaw pagpatiha it guardya.
Nag adto imaw sa binit ag guin pangayo sa panyo nga mangin prinsesa. Pagbalik na sa guardiya, nagpangayo kana it patawad. Nagkita sanda ko anang amang hari ag reyna. Naghugyaw ro tanan.
Samtang idto sa tore, pagkasayod ko ogre nga naka libre ro prinsesa, nagbalhin imaw nga pispis ag nag-adto sa palasyo. Owa man nana hakit-e ro prinsesa kundi isaeang ka maeaw-ay nga magueang ro perming naga adto sa hardin. Hasta gina-oy eon it binantay ro ogre, owa eon lang imaw magpadayon nga matuman ra handum.
Ko olihi, may hapili-an guid man nga prinsipe ro prinsesa nga anang nangin asawa. Guin kasae sanda ag natuman guid man ko hari ro anang pangayo nga maka apo. /MP
No comments:
Post a Comment