Tita Linda Belayro
Ro Bugaeon Nga Abogado
Isaeang ka bangkero it baroto si Tonyo. Guina swelduhan imaw it munisipyo sa pagdapit ag paghatod adlaw-adlaw sa mga pasahero sa rondayang isla. Tanan ro mga estudyante, trabahador, negosyante ag mga ginikanan hay nailaan guid imaw sa anang pag serbisyo sa mga tawo. Owa imaw naga pakita it pagka suplado maskin gina gaoy eon imaw, maskin gabi-i eon nga dapat nana ipahuway. Padayon gihapon ro pagtabok it mga tawo sa tanan nga oras.
Isaeang adlaw, may bag-ong tapos sa pagka abogado ro anang guina hatod sa isla. Naka suksok pa it Amerikana ag naka Samsonite pa nga bag ro eaeaki.
Samtang naga bugsay si Tonyo, nangutana ro abogado kay Tonyo. "Antiguhan ka baea it matematika? Pangutana it abogado. "Sori guid sir, mahina guid ako karon", mapainubuson nga sabat ni Tonyo.
"Hay sa history, may sayod ka baea? Dugang pa ko abogado. "Mas pa guid ron sir, permi abi ako nga naga palta kato sa klase tongod owa ako it guina plete sa saeakyan", sabat eon man ni Tonyo.
"Ay abaw… Toto, mga singkwenta porsyento eot-a ro naduea sa imong kabuhi. Hay siguro sa Science may hasayran ka eon. "Royon pa ro owa guid ako it naalung-ongan ay owa man abi ako it libro agud basahon. Naga dungok nga sabat ni Tonyo.
"Kon imaw ron, 25 porsyento eon lang ro habilin ko imong kabuhi. Nag panting ro dueonggan ni Tonyo. Matsa habatyagan man ko rondayang bugaeon nga abogado.
Pag-abot nanda sa madauem nga lugar it suba, nag pangutana si Tonyo. "Sir, kaantiguhan ka baea mag eangoy? Dayon tinikwang ni Tonyo ro baroto ag nahueog ro abogado. Indi gali kaantiguhan imaw mag eangoy.
"Sori sir, sanggatos porsyento ro naduea sa imong kabuhi. Pag dumdum ko tanan ro kaaeaman hay una kimo. Ro simpleng pag eangoy owa mo gali hatun-i? Naga kapay-kapay ro alima ko abogado. Bu-ot mag-padawat. Sa kaeo-oy ni Tonyo, ana nga guin dawat ro alima it abogado, anang guin hakwat ag ibalik sa baroto. Nangayo kana it pasensya ro guina eamig ag naga kibig-kibig sa kahadluk nga abogado.
Leksyon: Indi naton paghusgahan o pagmata-matahum ro ibang tawo. May mga butang nga hasayran it iba nga owa naton masayuri. Una eon kimo ro tanan nga kaaeaman ogaling hadiskubre nimo ro mga ordinaryo nga kaaeam nga owa nimo matun-i ag rondayon hay makita sa ordinaryong tawo eamang. /MP
No comments:
Post a Comment