Sugilanon Ni Tita Linda

Tita Linda Belayro

Phaeton, Onga It Haring Adlaw

Si Phaeton hay isaeang ka binatilyo nga mortal nga onga ni Apollo sa isaeang ka babayeng si Aurora. Raya ro guina pabugae ni Phaeton sa anang mga amigo. Tongod sa anang kakulitan ag pagka bugaeon, owa imaw kapan-o nga guina hibaygan imaw ko anang mga kahampang. Bu-ot nana nga mapamatud-an sa anang mga amigo ro pagiging onga gali ni Apollo.

Isaeang adlaw, nag eaong si Phaeton sa anang ina kon mahimo imaw nga maka bisita sa kaharian ko anang ama. Bu-ot nana nga masayuran kon matuod guid nga onga imaw ni Apollo. Guin sugtan mat-a imaw. Sa owa magbuhay, nakaabot guid man imaw sa puetahan it sueod nga imaw ro trono ko anang ama. Sadyaan guid ro palasyo ni Apollo. Sumueod imaw sa pihak nga puetahan. Sa anang pag tan-aw, ro atop it sueod hay ivory nga guina punihan it mga gae-um ag silak ko adlaw. Sa trono naga pungko ro anang ama nga may bisteng lila ag may bueawan nga korona sa anang oeo nga naga igpat sa silak it adlaw.

Naghibayag ro hari pagkakita kay Phaeton. Guin sampit si Phaeton nga magpaeapit. "Ano ro imong kinahangean Phaeton? pangutana ko anang ama. Guin tipon anay nana ro anang kaisog ag maghambae, "Bu-ot ko malang masayuran kon baea minatuod mo guid ako nga onga," baeos ni Phaeton. Sa pagkakita kana ni Apollo, guin hakus imaw ag guin pangutana kon ano ro anang pangayo.

"Bu-ot ko kunta nga kon mahimo hay maka padaeagan ako it karwahe bisan sang adlaw eamang. Sa paino-ino ni Phaeton hay ipakita sa anang mga amigo ro pruweba nga imaw hay onga it Haring Adlaw.

Masubo nga nag-pasugot ro anang ama. Sayod imaw nga owa guid it nangahas nga mag-buyot ko renda sa pag-padaegan ko karwahe it adlaw. Guin bilinan eamang nana ro anang onga nga hugtan eang ro pagbuyot ko renda ag pasugtan eang ro pagdaeagan ogaling indi dapat mag eapit sa mga kabukiran o katamnan tongod masunog ra kon magpaeapit sa adlaw. Guin sakyan ni Phaeton ro karwahe.

Ko una hay tayuyon ro daeagan it karwahe tongod agahon pa eang. Ogaling, pag-abot it udto ro adlaw, ro eana nga guin pahid kay Phaeton para indi imaw masunog hay amat-amat nga nag init ag indi nana matakuran ro kakatoe ko anang eawas. Busa napa kaeot imaw ag habatyagn ko karwahe nga iba ro anang pagbuyot. Nag umang ro daeagan it karwaheng adlaw hasta nag eapit sa mga kabukiran ag mga katamnan.

Indi eon mapunggan ni Phaeton ro pagdaeagan ag abo eon ro kasamaran nga nahimo ko karwaheng adlaw. Nag umang ro mga Diyos ag Diyosa it Olympus. Guin suguit ro tanan kay Jupiter. Pagkasayod ni Jupiter, guin tawag nana si Apollo sa nahanabu ko anang onga. Hapilitan nga guin haboy nana ro anang kilat agod mapundo ro pag dinaeagan sa owa it dereksyon ko adlaw. Nawasak ro karwahe ag nahueog si Phaeton sa eawod. Owa malipod ro tanan kay Apollo ogaling olihi eon ro tanan. /MP