3K Fun Run, Pagahimu-on Makaron

Pagahimu-on man makaron nga dag-on ro three kilometers (3K) Fun Run sa paea-abuton nga August 15, 2010, Domingo nga adlaw nga maga umpisa it ala sais it agahon sa barangay Pook sa banwa it Kalibo. Maga umpisa sa entrance it Kalibo International Airport (KIA) ag maga tapos sa Kalibo Pastrana Park. Paga agyan kara ro national high way it barangay Pook, Quezon Avenue, D. Maagma Street, maliko sa Mabini Street, maliko sa XIX Martyrs Street, ag masueod sa Kalibo Pastrana Park, sa atubang it Kalibo Police Station.

Daywang ka kategorya ro sarang nga entrahan, kamana it male – kid/adult, ag female kid/adult. Ro entrance fee hay P10 para sa mga estudyante, ag out of school youth, ag P50 para sa mga adult ag professional. May mga pa premyo nga naga hueat sa sin-o man nga magdaea-og.

Matandaan nga nangin madinaeag-on ro unang aktibidad it Kool Earth nga 3K Fun Run ko nagtaliwan nga dag-on 2009, bangod sa aktibo nga suporta, ag partisipasyon it iba-iba nga sector it komunidad, ag pilang ka indibidwal, eakip man ko Local Government Unit (LGU) it banwang Kalibo nagbulig sa grupo sa Ordinance No. 2009 – 004, o mas kilaea sa tawag nga Ecological Solid Manage-ment Code para mag-padayon nga malimpyo, eowas sa basura ag polusyon ro banwang Kalibo.

Angot kara, uman nga nagpaabot it suporta ag bulig ro LGU-Kalibo paagi kay Kalibo Mayor William Lachica. Anang guin pahayag ro anang suporta sa Fun Run tag nag courtesy call ro mga opisyales ag miembro it Kool Earth ko nagtaliwan nga Domingo sa ana nga taeatapan.

Ginpasaeamatan ni Mayor Lachica ro grupo bangod sa ginata-o kara nga bulig sa pagpaeapnaag, ag pagpatigayon it serye it mga aktibidades agod ipaabot sa pumueoyong Kalibonhon ro pag-angkon it disiplina sa mga kaugalingon, sa husto nga pagdepara it mga basura, ag sa pagmintina it kalimpiyo sa palibot.

Sa mga interesado nga magpasakop sa nasambit nga 3K Fun Run, sarang eamang nga maka bo-oe it application form sa klinika ni Dr. Cynthia Dela Cruz sa dating Blue Star School & Office Supplies nga nahamtang sa XIX Martys Street. Ro deadline sa pagsumite it mga entries hay sa August 10, 2010./MP