Sunday, August 15, 2010

Sugilanon Ni Tita Linda


Ni Tita Linda Belayro
Sa Likod Ko Kadueom
"Guina sumpa ko ro kapobrehan", raya ro perming guina hambae ag paeanabiton ni Mading sa anang kaugalingon. Iba abi ro pagtratar kana sa andang pamilya ko anang Lolo ag Lola. Masyadong guina paboran ro anang mga igkampod nga naga tuon sa mga sadyaan nga eskwelahan samtang sanda hay sa pang gobyerno eang nga owa it bayad.

Bata pa si Mading hay habatyagan eot-a nana ro ibang pagtrato kanda ko andang Lolo. Ro anang tiyo hay nakatapos it pagtuon sa kolehiyo. Isaea eon imaw nga mabahoe nga negosyante. Samtang ro ama ni Mading hay nag asawa nga owa pa makatapos it pag tu-on. Busa akig kanda ro andang Lolo.

Idto sanda nag estar sa isaeang ka skwater. Rikara nagbahoe si Mading sono kana. Ro solo guid lang kana nga nag aeam-aeam hay ro anang ina samtang naga baligya it alsada nga kaean-unon. Ro anang ama hay sangka kargador man sa pier.

Nagmasakit ro anang ama tongod sa sobrang bug-at it trabaho. Maskin guin daea imaw sa hospital hay owa guid matabangi tongod sa maiwat eon ro masakit nga Tuberculosis. Kapin pa nga nagdugang ro kaugot ni Mading tongod owa guid sanda pagbuligi ko anang Lolo. Agod maka pahuway ro anang paino-ino, nag-pamasyar si Mading sa pier. Samtang naga pungko imaw sa isaeang ka bato, hakita nana ro maeobog nga tubi. Nakikita nana ro anang kaugalingon kapareho ko kahigko nga tubi nga owa eon it pagtin-aw.

Paglingot nana sa tu-o, hakita man nana ro mga bato nga guina hampas it maeagko nga humbak ogaling owa guid natitiphag. Hakita nana ro anang kaugalingon.

"Ano baea kon kapareho ako ko rondayang bato? Matig-a ag malig-on nga indi gid magpa eopig sa ano mang hampas it problema nga nagaabot kakon". Tumindog si Mading ag nag uli sa andang baeay. Hakita nana ro anang ina nga naga himos ko anang baligya. "Pareho man it bato ro akong ina", may paghanga nga hambae ni Mading.

Tumaliwan ro kinse anyos. Isaeang ka eaeaki ro nanaog sa isaeang ka saeakyan. Nagpadueong sa dating bato nga ana anay guin pungkuan.

"Tama si Nanay, sa likod ko kadueom, may kahayag nga naga hueat". Naga hiyom-hiyom nga mitlang samtang guina tan-aw ni Mading ro mga bato nga sigeng guina hampas it humbak. /MP

No comments: