May mga Diyos ag Diyosa sa bukid it Olympus nga naga estar kaibahan it mga mortal. May mga Diyos man nga may mga onga sa mga mortal. Isaea eon si Ceres nga may onga kay Haring Zeus nga guin pangaeanan nga si Proserpina. Si Reyna Ceres hay guina kilaea nga Reyna it mga kabueakan.
Guina tatap nana it ma id-id ro anang hardin. Tongod kara, abo nga mga alebang-bang ag kapispisan ro naga dayo sa anang paraiso. Ro anang onga nga dalagitang si Proserpina hay una naga hinampang sa hardin haeos kada adlaw.
Isaeang adlaw, samtang guina eotos ni Proserpina ro isaeang ka alebang-bang, nakita imaw ni Haring Xerxes. Imaw ra rong hari it Kaharian sa edaeom it eogta. Nabighani imaw kong kagwapa it daeaga. Busa, guinplano nana nga kidnapon (takawon) rong daeaga. Tongod owa’t bantay si Proserpina, natuman ro anang handum.
Nabo-oe ni Haring Xerxes rong daeaga ag guinsakay sa anang karwahe. Anang guin-daea sa idaeom it eogta.
Pagkahapon ko adlaw ngato, owa naka oli si Proserpina. Guinlibot ni Ceres rong bilog nga hardin ay basi nahakatoeogan sa mga kabueakan si Proserpina. Pero owa guid imaw it hakita. Nakataliwan rong bilog nga gabi-i sa pag inosoy kay Proserpina. Bangud sa anang pag-inusoy, napabay-an eon nana ro anang hardin.
Nag – adto imaw kay Haring Zeus, ama ni Proserpina. Tongod may gahum imaw, guin tan-aw nana sa bolang kristal. Idto nana nakita nga si Proserpina hay sa idaeom it kaharian ni Haring Xerxes. Abo nga paagi rong guin obra ni Haring Xerxes agod mangin Reyna si Proserpina sa anang kaharian, ogaling indi magsugot rong daeaga ag bu-ot nanang mag-oli.
Guina sugtan imaw kon magkaon anay it prutas nga Granada agud mapadali ro anang pag – uli. Guinkaon nana rong katunga ko prutas.
Guin sueod it mga soldado ni Haring Zeus rong kaharian ni Haring Xerxes. Nabawi si Proserpina. Nalipay gid it duro ro anang inang si Ceres. Guin pangutana imaw kon may naka-on imaw sa idaeom nga kaharian. Guin suguid nana nga sangka prutas nga Granada ro anang naka-on ag nahatoeon rong an um (6) ka bosoe. Masubo nga nalipay si Reyna Ceres, bangud sa kada bosoe nga anang nakaon, nagakahueogan nga sang buean nga maga tener imaw sa idaeom it eogta kada bosoe. Ngani, komo an-um ka bosoe ro anang hatueon, magatener imaw it an-um nga buean sa idaeom ag an-um man nga buean iya sa ibabaw it eogta kada dag-on.
Kon iya imaw sa ibabaw it eogta, naga bueak ag naga hugyaw rong mga kapispisan, pero kon idto imaw sa idaeom, nagaka eagas ag naga kamatay rong mga tanum.
Raya man rong dahilan nga rong bilog nga kalibutan hay may ap-at ka "seasons". Spring, summer, winter ag autumn.
Kon spring ag summer, iya sa ibabaw it eogta si Proserpina. Kon autumn ag winter hay idto imaw sa maeamig ag madueom nga kaharian ni Haring Xerxes sa idaeom it eogta. /MP mailto:madyaas_pen@yahoo.com
No comments:
Post a Comment