Ella Engkantada
Rong kaharian it mga engkanto hay putos it kalipay sa pagkatawo it isaeang ka Prinsesa. Dungan sa anang pagkatawo, nagbueok-ead ro mga kabueakan. Rong mga prutas nagpadayon nga nagatoeobo ag maw man ro mga amamakoe. Napuno rong bubon it bueawan nga tubi nga ilimnon it mga engkantada.
Gin pangaeanan ro prinsesa nga si Ella. Pagbahoe ni Ella, nagpamasyar imaw sa bilog nga kaharian. Sa pagsunod nana sa isaeang ka alibang – bang, naka–saka imaw sa isaeang ka pukatod. Dayon nanang nadiskubre rong ibang kaharian.
Maeagko ro mga baeay, madasig ro mga saeakyan ag eroplano. Nawili imaw it tinan-aw. Sa owa magbuhay, nanaog imaw. Indi imaw makita it tawo. Sige ro anang pinamasyar. Sari-saring mga tawo ro anang nakita, may matambok, maniwang, maintok, ag masakiton. May mga onga nga arikison, mga naga kalhit sa kalye. Mahigko rong palibot, eabi gid ro mga pamaeay. Abo nga asô nga naga halin sa guin sunog nga basura. Nag buyog ro anang oeô ngani nag-uli eon lang imaw. Guin suguid nana sa anang Inang Reyna rong anang nakita. Gin inga-an imaw. Indi eon imaw pagpabalikon. Ogaling indi nana malipatan ro anang nakita.
Nagbalik imaw it uman. Sa isaeang ka baryo, abô nga pobre, masakiton ro mga onga ag kueang rong pagkaon. Ko gabi-i ngaron, may nagbutang it mga pagkaon sa ogsaran it mga kabeayan. Pagka – aga, hakibot rong mga tawo. Sige rong pagdinaea it pagkaon sa mga baeay. Nasadyahan rong eawas it mga onga. Tongod owa nanda masayri kon sin-o rong nagabinulig kanda, nagsueat sanda sa mabahoe nga papel it mao ra "Kon sin-o ka man nga nagabinulig kamon, saeamat guid nga abo".
Nag-adto eon man imaw sa ibang baryo. Abo nga mga onga nga owa nagaadto sa eskwelahan. Naga hinampang eamang sa kalye, naga sugae, naga sigarilyo ag naga pinanakaw.
May umabot nga mga karton sa mga klase. May marka nga "Para sa mga mahugod, mag-adto sa eskwelahan", Ro sueod it karton hay mga eambong, saewae, sapatos, bag, tsinelas.
Masunod nga Domingo, umabot rong katapusan nga karton nga may sueod nga mga pagkaon, de lata, gamit sa pamaeay ag kusina. "Para sa mga mahugod nga mga ginikanan.
Kada onga ag ginikanan bo-ot nga makaangkon ko rayang mga gamit. Nagmuk-eat sanda sa kamatuoran. Maskin owa eon rayang mga bulig, kinahangean nga maghugod eon sanda, tatapon ag bantayan ro andang mga inonga.
Bo-ot nanda nga magpasaeamat ogaling owa nanda makilaea ro tawong nagtina-o it bulig. Paagi sa imahinasyon, guin obrahan nanda it munomento. Iseang ka anghel, maputi, mahaba it buhok, ka itsura guid ni Ella Engkantada. /MP mailto:madyaas_pen@yahoo.com
No comments:
Post a Comment