Sugilanon Ni Tita Linda

Tita Linda Belayro

Rompe Kandado (Barakuda)

Barakuda ro isda nga guina kahadlukan it mga mangingisda. Kon maka poeapot sa lambat, sigurado guid nga wasak tongod ko anang mataeum ag mataeawis nga pantok. Ro grabe pa guid hay kon matuhog ro tawo sa tiyan ko anang mataeawis nga pantok hay ga guwa guid ro tina-i ko naninahan.

Idto sa nasyon nga Burma, abo guid rondayang isdang Barakuda. Abo nga kabuhi ro nag kaeaduea sa Burma tongod sa rayang isda. Namatay ro tatay ni Prang, imaw man ro anang Lolo, puro mga mangingisda. Abo eon nga paagi ro hari agod indi makasueod ro isda sa andang baybayon ogaling tanan hay kapaslawan eamang tongod kon magtaob abi it madaeum hay naga sueod ro isda agod manginaun.

Ko agahon ngaron, samtang naga pamasyar si Prang sa baybayon, hakita nana ro naga barlak nga panit it mga Barakuda. Sa indi magbuhay, maga sueod eon sa baybayon kon magtaub. Nagdaeagan imaw sa palasyo agod isugid sa mahae nga hari. Nag pabakae it maeagko ag matingting nga mga lambat ro hari. Pagsulong it taob, umatake ro mga Barakuda ag nawasak man guihapon ro mga lambat. May mga tawo nganing hatuslok pa ko isda.

Owa eon it mahimo ro hari, busa, nag pabando imaw sa bilog nga kaharian nga kon sin-o ro makahimo it paagi nga mapatay nana ro mga Barakuda hay may premyo nga mabahoe nga paga batunon. Samtang naga pungko sa isaeang ka eoka nga kahoy si Prang, may nagpaeapit kana nga monghe ag may guin dawat nga retrato. Una sa retrato hay mga puno it saging ag naka tuslok ro mga pantok it Barakuda. Nag-adto imaw sa palasyo ag guin pakita nana sa hari ro retrato. Insigida nag pasugo ro hari nga ipatapas ro puno it mga saging agod ipatindog sa kahaba-on it baybayon nga guina buytan it kada isaeang ka eaeaki.

Pag-abot it taob, umatake eon ro mga Barakuda. Owa nanda makita ro mga guin tagdok nga puno, busa sa mabaskog nanda nga pagsunggab, hatuslok ro andang pantok sa puno ag owa nakahalin. Paghunas, naga linya ro mga isda nga naka tuslok sa mga puno. Nagpyesta ro mga tawo sa kaabo-on nanda nga pagkaon it isda. Mas nag pyesta pa guid si Prang tongod mabahoe ro anang habaton nga premyo. Guin himo pa imaw nga tawuhan sa palasyo. /MP