Thursday, November 19, 2009

Sugilanon Ni Tita Linda


Ni Tita Linda Belayro

Naghigugma Sa Isaeang Ka Retrato
Si Remus hay isaea man sa mga batikan nga pintor sa Roma. Bisan may edad eon imaw, owa pa man naga asawa tongod abo pa ro anang hakitang maeaw-ay sa mga babaye. Guin sumpa nana nga indi guid imaw mag-asawa kon indi makakita it isaeang ka perpektong babaye.

Isaeang adlaw, nag-pakita imaw it anang gin pinta, isaeang ka gwapahon ag perpektong babaye. Abo ro nagdayaw ko anang guin pinta. Ko olihi, nag pangimun imaw tongod abo nga kaeaeakihan ro naga dayaw sa retrato, busa anang guin tago. Kada gabi-i, guina estoryahan nana ro retrato. Ana pa nganing na regaluhan it bueak, mga sari-saring bato ag pahumot kapareho sa isaeang ka matuod nga babaye.

Sa templo ni Venus, nagpangamuyo imaw it isaeang ka asawa kapareho ko anang retrato nga guin pinta. Pag-uli nana sa andang baeay, idto pa si Remus sa guwa, hakibot imaw nga mahayag ro andang baeay. May babaye nga halin sa kusina nga may daeang pagkaon. Kilaea nana ro uyahon ko babaye. Owa imaw magsaea. Raya ro babaye sa retrato. Guin pamati-an ni Venus ro anang pangayo.

Halin kato, nag-iba sanda nga sangka mag-asawa. Guin hambaean imaw ko anang asawa nga sunugon ratong retrato. Nanugunan si Remus busa anang guintago sa ibabaw it kisame. Pagtaliwan it pilang dag-on, nagkaunga sanda it daywa nga puro man babaye. Owa kapilahi, maeagko eon ro daywang ka onga.

Isaeang adlaw, nag-saeampitan ro daywang ka onga nga mag hampang it taguan. Tongod sa owa ro andang ama hay pagusto sanda it adto maskin siin nga lugar it baeay. Naka saka ro magueang idto sa kisame. Hakita nana ro retrato. Guin papanaog nana ag ipakita sa anang igmanghod. Tama man nga nag-abot ro andang ina nga halin sa pag-ipo it mga prutas.
Pagkakita nana sa retrato, mingko gin buno it kutsilyo ro anang dughan ag imaw hay natumba. Nag sininggit ro daywang ka onga it tabang. Pag-abot ko andang ama, patay eot-a ro andang ina.
Abu guid ro pag no-oe ko andang ama. Kon anat ana nga guin sunog ratong retrato, buhi pat-a guihapon konta ro anang asawa. Ngani, imbis nga sug-an ro retrato, guin butang nana sa isaeang ka maeahaeon nga kwadro ag guin butang una sa sala ko andang baeay. Nag gueang imaw nga sambilog eang nga babaye ro anang guin mahae. Kada gabi-i, guina estoryahan nana rondayang retrato nga mingko buhi. Kon imaw mahilong, hakikita nana ag nababatian ro limog ko anang asawa nga nagalingaw – lingaw kana.

Owa magbuhay ro kabuhi ni Remus tongod sa pagpabaya sa anang kaugalingon. Kon kis-a nalipasan imaw it gutom. Pagtaliwan it pilang dag-on, habugtawan si Remus ko anang mga onga nga patay eon nga anang guina hakos ro retrato sa anang dughan. Rikara nagtapos ro estorya it isaeang ka pintor nga naghigugma ag nag-asawa sa isaeang ka babaye sa retrato. /MP

No comments: