Sugilanon Ni Tita Linda

Ni Tita Linda Belayro

Ro Prinsesa Ag Ro Higante

May isaeang ka gwapahon nga Prinsesa. Sangka prinsesang nailaan guid it duro ko isaeang ka Higante. Prinsepe man konta rondayang higante ogaling masyadong maeaw-ay. Tongod owa imaw naila-i ko Prinsesa, guin padaea nana ro anang alilang mabahoe nga pispis agod panid-an adlaw-adlaw kon ano ro guina obra ko prinsesa.

Ro hilig ko prinsesa hay ro mag adto sa anang hardin adlaw-adlaw. Ko iseang ka agahon ngaron, may sangka alibang-bang nga sadyaan it kolor. Nag paeapit sa prinsesa. Bu-ot nga dakpon ko prinsesa, ogaling nag paeagiw ro alibang-bang. Guin sunod imaw it prinsesa hasta naka guwa sanda sa hardin ag tongod sa pag pinanaw ha adto sanda sa may kantil. Idto gali naga hueat ro karwahe it higante. Guin pilit ro prinsesa nga guin pasakay. Guin daea imaw sa isaeang ka torre. Halin kato, rikara nag-estar ro prinsesa. Guina daehan imaw it pagkaon ko mabahoe nga pispis.

Ko olihi, naka paino-ino it ideya ro prinsesa kon mauno makatakas. Guin sugo nana ro pispis nga daehan imaw it mga dahon it baki-baki agod obrahon nga bag ag banig. Natuman ro anang hinyo. Imbis nga banig ag bag ro anang guin obra, guin saeapid nana ro dahon ag obrahon nga kaeat. Owa guid maka sayod ro pispis kon ano ro guina obra ko prinsesa hasta nga kahaba-haba eon ro kaeat. Ana nga guin tun-tun paidaeum.

Amat-amat it panaog ro prinsesa, tag sa ubos eon, nagdaeagan ro princesa paadto sa kagueangan. Nakakita imaw it isaeang ka maisot nga baeay nga guina estahan it mga duwende. Nag eaong imaw nga una anay imaw ma estar it pilang adlaw. Nagsugot mat-a ro mga duwende. Naila guid sanda tongod sa kahugod it prinsesa.

Guin taw-an imaw it mga batong puti. Kon magpaligos imaw, anang guina hueog ro bato sa tubi. Sa rayang paagi, imaw hay mangin maeaw-ay, ogaling sa panueok ko anang mga kaapin hay gwapahon mat-a imaw.

Nag eaong imaw sa mga duwende ag nagbalik sa kaharian. Duro guid ro kalipay ko anang ama ag inang reyna tongod naga eaum sanda nga patay eot-a imaw. Samtang naakig ro higante kat pagkasayod nga naka paeagiw ro prinsesa. Guin paadto nana ro alilang pispis agod sayuron kon nagbalik ro prinsesa sa palasyo. Hakita ko pispis nga maeaw-ay ro hitsura ko anang hakitang prinsesa. Guin sugid ko pispis ro anang hakita. Naduea ro paghanga ko higante ag guin lipatan eon lang nana ro kaila sa prinsesa. Nagkabuhi it malipayon ro prinsesa kaibahan ko anang pamilya. Owa eon imaw naga adto sa hardin kundi una eon lang naga obra it hardin sa ibabaw it palasyo. /MP