Sugilanon Ni Tita Linda

Tita Linda Belayro

Pispis Nga Adarna

Sa guin harian it Berbanya, mabuhay eon nga naga masakit ro andang hari. Tanan ro mga eksperto nga doktor sa naga kaeain-eain nga masakit hay guin patawag, ogaling indi guid nanda matugma ro baeati-an it hari.

Isaeang adlaw, may manog pakalimos nga nag-adto sa palasyo it hari. Indi imaw pagpasudlon it guwardiya tongod basi kuno matapnan it masakit ro hari. Naga pamasyar guid ro reyna ko mga oras ngaron. Pagkakita na ko magueang, anang guin tawag.

Guin pakaon anay ko reyna ro magueang. Hakita abi nana nga matsa maeoya eon. Nagpasaeamat guid it abo ro magueang pag-katapos it kaon. Sa anang paghambae, hasayran nana nga naga masakit ro hari. Naghambae ro magueang nga ro pispis nga Adarna ro maka bueong sa hari.

Idto makita ro pispis sa bukid it Tabor sa isaeang ka kahoy guina hingadlang Piedras Platas. Pilegroso ro pag dakop kara ogaling kon desidido ro mga prinsipe hay madakpan nanda ro pispis.

Nagpadaea ro palasyo it sugo agod dakpon ro Adarna . Una nga nagpanaw ro kamagueangan nga Prinsipe, si Don Pedro. Guin pabaeonan imaw it tinapay, aeak, ag mga kagamitan. Sa tunga it daeanon, may hasubeang imaw nga babaye nga naga pakalimos. Owa nana paglimosi ay naga dali imaw.

Pag-abot sa bukid it Tabor, nagpahuway imaw sa puno it kahoy ag nagpahaum agod mag-ihapon. Pagkatapos it kaon, tongod sa sobrang kaga-oy hay hakatoeogan imaw. Pag-abot it alas dose, umabot eon ro pispis nga Adarna. Sa kinaugali-an, nag kanta anay, dayon namayagpag, umiti, ag tumueog. Owa it kalibutan ro Prinsipe sa pag-abot it pispis. Busa hatama-an imaw ko iti it Adarna. Tongod sa iti, nangin bato ro prinsipe.

Pilang adlaw eon ro nagtaliwn, owa pa guid maka uli si Prinsipe Don Pedro. Tongod sa owa it pag-uli it Prinsipe, guin sugo eon man ro pangaywa. Nagpanaw man dayon si Prinsipe Don Pablo. Imaw man ro hanabo kana. Inityan it Adarna, busa nangin bato.

Nahawag eon ro reyna sa pagkaduea ko daywang ka Prinsipe, ngani hapilitan nga usoyon sanda. Si Prinsipe Don Juan ro ikatlong sugo agod usuyon ro daywang ka magueang nga Prinsipe ag imaw man ro pag-usoy sa pispis nga Adarna.

Sa tunga it pagpinanaw ni Prinsipe Don Juan, may hasubeang imaw nga magueang nga naga pakalimos. Naeo-oy guid imaw it duro, busa nanaog imaw sa anang kabayo agod pakan-on ro magueang. Pagkatapos it ka-on, guin taw-an imaw ko magueang it sintas it sapatos, simuyaw, ag siyaw nga mataeum. Guin taw-an pa guid imaw it bote nga may tubi agod ibu-bu sa daywang ka bato sa puno it Piedras Platas.

Parabil imaw nag-padayon sa pagpanaw, guin bilinan man imaw nga indi mag pahuway sa puno it kahoy. Pag-abot nana sa bukid it Tabor, nag-eaha imaw it pagkaon agod mag-ihapon. Duro guid ro anang kadoeoygon. Agod indi imaw hikatoeog, guin ninahan nana ro anang butkon ag guin patoeo-an it simuyaw. Sobra ro hapdi nga anang habatyagan busa, naduea ro anang kadoeoygon. Pag-abot it alas dose, umabot eon ro pispis. Nagkanta, dayon nag pamayagpag. Ro anang kanta hay naga pa-eoyok guid it kadoeoygon, busa, guin kiwa eon man ni Prinsipe Don Juan it siyaw ro anang butkon agod indi imaw pag duygon.

Pagkatapos it pamayagpag, umiti ro pispis nga Adarna ag dayon tomoeog. Pagka pan-o ni Prinsipe Don Juan nga toeog eon ro pispis, guin saka nana ro puno it kahoy agod dakpon ro pispis. Anang guin higtan it sintas. Guin bu-buan dayon nana it daeang tubi ro daywang ka tawo nga unang nangin bato sa puno it kahoy. Nabuhi ro anang daywang ka magueang nga sanday Prinsipe Don Pedro ag Don Pablo. Masadya sandang nag kueopkupan.

Nagpahaum dayon sanda sa pagbalik sa palasyo. Sa daeanon sa andang pag-uli, guin traidor ko daywang ka magueang si Prinsipe Don Juan paagi sa paggapos kana sa isaeang ka puno it kahoy. Inaywan nanda ag sanda ro nagdaea ko pispis nga Adarna sa palasyo.

Pag-abot sa palasyo, owa guid magkanta ro pispis. Ro hari hay padayon nga naga grabe ro kahimtangan tongod sa masakit. Samtang, nag-agi ro isaeang ka magueang ag guin hubad nana ro gapos kay Prinsipe Don Juan. Nagdali-dali nga umuli si Don Juan. Pag-abot nana sa palasyo, gulpi nga nagkanta ro pispis. Guin suguid tanan nga natabo ni Prinsipe Don Juan.

Nagmayad ro hari. Ogaling, naakig it duro imaw bangod sa pag eo-ib ko daywang ka prinsipe kay Prinsipe Don Juan. Guin patawad mat-a sanda ni Prinsipe Don Juan. Makaron, si Prinsipe Don Juan eon ro hari it Berbanya. /MP