Sugilanon Ni Tita Linda

Ni Tita Linda Belayro

Pabula It Isaeang Ka Kamelyo

May isaeang ka negosyante. Sa anang pag warang agod mag bisita sa anang mga suki, nag sakay imaw sa isaeang ka kamelyo. Tongod gabii eon, hanaeang sanda sa disyerto. Humangin it mabaskog nga may daeang baeas. Nag desisyon imaw nga una lang mag pataliwan it gabii. Matapos nga mapatindog ko negosyante ro anang tolda, nagpahaum eon man imaw nga mag ihapon, samtang idto ro anang kamelyo sa guwa. Naga umpisa eon it mingko guina eoyok it kadueoygon imaw tongod sa kaga-oy. May habatian imaw nga naga panuktok. Nag-bangon imaw. Hakita nana ro anang kamelyo nga naga panuktok.

"Amo, mahimo baea nga makasueod ro akong ilong sa imong tolda? Mabaskog abi ro hangin iya sa guwa ag indi ako makaginhawa bangod sa madamoe ro baeas", hinyo ko kamelyo. Naeo-oy guid ro negosyante tongod mabuhay eon nga naga serbisyo kana ro kamelyo. Busa, ana nga guin pasueod. Owa ngani mabuhayi, ag nag panuktok eon man ro kamelyo.

"Amo indi eot-ang makatakod. Puno eot-a it baeas ro akong mata ag doeonggan. Mahimo baea nga mapasueod mo ro akong oeo?" pangaywa nga pangayo it kamelyo. Sa kaeo-oy, guin pasueod eon man ro oeo ko kamelyo. Sige ro huyop it hangin ag amat-amat man nga naga eamig. Sa uwa magbuhay, nanuktok eon man ro kamelyo.

"Amo, naga paeanig-a eon ro akong alima mahimo baea nga pasudlon mo man ro akong alima?" pangatlong hinyo ko kamelyo. Hasta naga nagub ro gabii, naga dugang man ro kaeamig. Ag owa mabuhayi, nanuktok eon man ro kamelyo.

"Amo, mamatay eon ako sa kaeamig, maeo-oy ka kakon." Owa ngani naka bangon ro negosyante, sinipa eon ko kamelyo ro anang amo. Halin ko pagkasipa, idto naagahan ro negosyante sa guwa. Idto imaw magkatoeog tongod naduea-an imaw it pangalibutan sa pagsipa kana ko kamelyo. Idto sa sueod it tolda nagkatoeog ro kamelyo. Tongod sa anang kabahoe, indi sanda mag-igo nga daywa sa sueod it tolda busa anang sinipa ro anang amo. /MP