Sugilanon Ni Tita Linda

Tita Linda Belayro

Gamhanan Nga Lion, Kubos Nga Eanggam

Guina kilaea nga pinaka gamhanan sa tanan nga hayop ro lion. Imaw ro guina tahod nga hari tongod kon imaw mag ngueob, naga kurog ro tanan nga hayop sa kagueangan. Kon sa oras it partihan, daywang parte guid ro ana bilang hari. Owa guid it naga reklamo sa hueo eayan tongod sa kahadluk kana ko iba. Naga pangamuyo eon lang ro mga ibang hayop nga konta hay may makatupong man kana agod magbaylo ro anang pamatasan, ogaling matsa owa pa gid it maabot.

Isaeang adlaw, may nagpa alinton it hambae nga maabot ag maga bisita ro grupo it mga elepante. Nalipay ro mga hayop tongod sa kabahoe it mga elepante hay basi mahadlukan ro lion. Una nga nag-abot ro emisaryo nga eanggam. Hakibot ro haring lion nga ham-an it eanggam ro nagpaabiso kana. Guin baton nana ro pagtahud it eanggam.

Owa man ngani mabuhayi hay nag abot eon ro mga grupo it elepante. May nagasakay nga isaeang ka bueawan nga hawla sa elepante ag guina payongan it telang seda agod indi masilakan ro naga sakay. Abo nga naga hueat nga mga hayop.
Pagbukas it hawla, isaeang ka eanggam ro nana-og nga naka biste imaw it seda ag may koronang bueawan. Imaw ro reyna it mga elepante. Guin papanaog ro regalo it eanggam. Nagkaway-kaway pa ro eanggam sa mga hayop. Pagkatapos it pagkaeamustahan, nag uli eon ro mga bisita.

Guin pasueod ko lion ratong mga pagkaon sa sueod ko anang kweba. Nag abot ro tag gutom. Ogaling owa guid magtao it pagkaon ro lion sa anang guin sakupan. Sa kaakig it ibang hayop, nagpanaw sanda sa ibang lugar. Owa man magbuhay, tongod nagpanaw ro ibang hayop, naubos ro pagkaon it lion ag owa eon it naga usoy para kana it pagkaon. Busa imaw eon lang ro nag usoy ko anang pagkaon sa kagueangan hasta hadakpan imaw it mga sirkero agod ipaguwa sa karnabal.

Naka putos imaw it matingting nga lambat, indi imaw makaguwa. Hakita imaw it isaeang ka eanggam. Amat-amat nga guin ngat-ngat it eanggam ro lambat hasta imaw naka buhi. Abu guid ro anang pasaeamat sa eanggam.

Halin kato, nagbu-ot eon ro lion sa anang mga sakop tongod sa leksyon nga guin pakita kana ko eanggam. /MP