Tuesday, September 19, 2006

Sugilanon Ni Tita Linda

Tita Linda Belayro

Magic Guitar

Onga pa si Ompong hay maila-on eon sa musika. Ro anang ama hay isaeang ka musikero, ogaling abusado, hanangga sa sugae ag sa babaye. Owa mabuhayi, nagmasakit it Tisiko ro ama ni Ompong.
Naga ilig sa ugat ni Ompong rong dugo it musikero. Hilig nana rong pagkanta, pagtukar ag pagpamati sa musika. Sa bata nga edad, handum eon nana ro maka-angkon it guitara. Kada agi nana sa baraka nga naga baligya it guitara, guina tan-aw nana rong paboritong guitara sa sueod it estante.
Isaeang adlaw, samtang naga tabuk si Ompong sa kalye, may isaeang ka magueang nga sangkiri eang ma hapit it saeakyan. Mayad ngani ay habuytan imaw ni Ompong. Nagpasaeamat ro magueang. Bilang pagkilaea ko anang guin obra, guin pangutana si Ompong kon ano ro anang naila-an.
Hadumduman nana ag owa’t abong sibug nga guin sugid rong guitara! Guin bakae kana rong guitara. Guin ham-eos pa anay ko magueang rong guitara bago ita-o kay Ompong.
"Umpisa makaron, mangin malipayon ka," hambae it magueang. "Lingawon mo rong mga pobre, masakiton, masubo, ag mga kababayen-an. Gamiton mo raya sa kamaeayran," padumdum it magueang.
Naduea it golpe rong magueang. Guindaea sa andang baeay rong guitara. Pagkatapos it ihapon, guintukar rong guitara. Ro kutob nakabati, hay naga – ugan ro andang baeatyagon, malipayon man kon masadya rong tukar. Rong musika hay naka-abot ag nabati-an sa ika pitong bukid.
May isaeang ka prinsesa si Prinsesa Nida nga guin preso ko isaeang ka Higante nga naila kana sa ika pitong bukid. Guinabantayan guid ro prinsesa sa tanan nga oras maskin sa pagkatueog. Pagkabati ko tukar, dinuyog rong Higante, ag naha katueogan. Samtang naga katueog ro Higante, naka libre si Prinsesa Nida ag naka uli sa anang kaharian. Naghugyaw rong tanan sa pagbalik ko prinsesa.
Sa pagtaliwan it dinag-on, si Prinsesa Nida hay gustong paasawahon ko hari tongod magueang eon imaw. Owa guid it naila-an ro prinsesa sa mga sultero nga kilaea nana. Kon sin-o rong makapalipay, makapatangis o makapasubo sa prinsesa, imaw rong ipa-asawa, suno sa hari.
Sa owa guina huna huna–a, sa pagpasimpaead, hay naka-abot si Ompong sa royong kaharian. Nabasahan nana rong pahisayod una sa plaza, sa bulletin board. Busa, nag adto imaw sa palasyo. Nag prisentar imaw sa hari. "Mapalipay mo baea, mapatangis o mapasubo rong ongang prinsesa?" Pangutana’t hari. "Hu-o mahae nga hari," sabat ni Ompong. "Abi, samitan ta," sugo ko hari. Dayon nanang guintukar ratong musika nga nakapatoeog sa higante. Pagkatapos, guin tukar man rong maka sueobu nga musika ag owa napunggi ko prinsesa ro pagtangis.
Hadumduman nana rong musika nga nakapalibre kana. Guinsu-uran ni Prinsesa Nida si Ompong. Nag subeang ro andang mga mata. Matsa may naghutik kay Ompong nga tukahon rong tukar it paghigugma. Ro tukar hay naka antig sa tagipusuon it prinsesa. Owa magbuhay, guinkasae ro daywa. Pagkataliwan it pilang dag–on, nag onga sanda. Ro andang mga onga nga prinsipe ag prinsesa hay puro mayad man magtukar. Guinpamana ni Ompong rong guitara sa anang kamagueangan nga onga. Nangin mabuot nga hari si Ompong kaibahan ko anang hinigugmang Prinsesa Nida, mga onga nga mga musikero ag musikera man. /MP mailto:madyaas_pen@yahoo.com

No comments: