Sugilanon Ni Tita Linda

Tita Linda Belayro

Secret Love

Kalibonhon si Menyong. Makita imaw nga naga linibot iya sa Kalibo, pero idto imaw perme sa Kapitolyo. Permeng limpyo, nakapiluka ra buhok, ag plantsadong puti nga mahaba it butkon ro camisa dentro.
Ham-an permeng sa Kapitol si Menyong? Empleyado baea imaw? Bukon. Nagapati baea kamo nga iya sanda nagakita ko anang nobya sa Kapitolyo? Empleyado man baea ro anang nobya sa Kapitolyo? Bukon. Hay sin-o ro anang nobya?
Tipikal nga eaeaki si Menyong. Naga tuon imaw sa isaea sa mga eskwelahan iya sa Kalibo. Ma-aeam si Menyong ag may handum nga mangin isaeang ka abugado sa paaeabuton. Abo ro anang idolong mga batikan nga abogado iya sa Aklan. Handum nana nga mag depensa sa mga gina eopig sa korte, maka – atubang ro mga abugado ag ihathat ro kinamatarong sa huez agod idepensa ro anang kliyente.
Kon sa nanong bangod ro pagbaylo it tiempo, isaeang hapon, nag-uli si Menyong nga mahipos, aborido. Guin pangutana imaw ko anang ina ogaling owa magsabat, kud-om ro bibig. Nag-eaong imaw kay nanay na, mamasyar kuno imaw. Guinhapit imaw sa andang baeay ko anang amiga. Guin sugtan imaw. Nagpamasyar sanda. Nangin sige-sige ro anang pag pinanaw kada adlaw. Ko olihi, indi eon mag-adto sa eskwelahan si Menyong tongod naga hueat imaw perme sa anang amiga.
Guin patan-aw si Menyong sa Doktor. Guin daea imaw idto sa Pototan, Iloilo sa pagtuman ko sugo ko doktor. Ka’t idto sa Pototan, nagwaeas si Menyong bangud buot nga mag-oli. Ko olihi, nag oli imaw nga owa masayri it Doktor. Guin patan-aw imaw sa medico sa barangay. Babaye kuno ro kabangdanan suno sa kwak doktor. Owa man masayri kon sin-o ag taga siin rong babaye.
Guin pa ban-aw it mediko si Menyong. Suno sa ban-aw, naga estar kuno sa isaeang ka mabahoe nga puno it kahoy, maeapit sa eskwelahan ro babaye. Idto nana nakita rayang babaye nga nangin kaklase. Nagkaila-an sanda. Perme sandang nagakita sa mahayag nga lugar maeapit sa kapitolyo. Kon indi sanda magkita sa gabii, guina bantayan nana rayang babaye sa agahon hasta sa hapon. Imaw nga imaw ro anang guina obra hasta imaw hay magueang eon.
Kon hin-uno matapos rong pag hueat ni Menyong ag mataw-an it kahigayunan rayang paghigugma, owa it nakasayod. Ogaling ro kamatuoran, si Menyong padayon sa anang pag hinueat sa rayang babaye. Umuean man o sumilak rong paniempo, iya perme imaw sa kapitolyo. Isaea ako sa naka pan-o kana adlaw-adlaw. /MP mailto:madyaas_pen@yahoo.com