Ro Onga It Bulkan
Naga eopok eon man rong Mayon Volcano. Owa pa ngani nag-oeat rong natabo ko naunang pag-eopok, hayra eon man rong sunod nga pag-eo-ad it lava.
Sa nakataliwan nga pag-eopok kong rayang bulkan, may isaeang natabo nga nalipod sa mga tawo puera eamang sa isaeang ka pamilya nga may ka-angtanan kara.
Samtang nagabisita si Mang Aldo ag Aling Oning sa andang katam-nan paglinong it bulkan, may eapsag sanda nga nakita sa idaeom it kahoy. Owa it eambong rayang eapsag. Andang guin sapopo ag guin daea sa andang baeay agod tatapon. Eaeaki rong eapsag. Bangud owa pa it pangaean, guinpangaeanan nanda kay Mayono sa pag kilaea nanda sa bulkan mayon.
Nagbahoe si Mayono sa kaeanasan. Abo kon magkaon it tinoea ngani mabakod ro anang eawas. Mahilig man imaw makipag hampang sa mga hayop. Mahugop kana ro mga hayop.
Isaeang adlaw, rong tanan nga hayopan hay ona sa kaeati-an. May umabot nga lobo ag guinkaon rong maisot nga kanding. Sa kaakig ni Mayono, golping nag-guwa rong kaeayo sa anang mata ag nasunog rong lobo. Hakibot man si Mayono ham-an gumuwa ro kaeayo sa anang mata.
Nadiskobrehan ko ina ag ama si Mayono. Guinpangutana imaw kon ham-an nag kaeayo ra mata. Owa imaw it ikasabat.
Kada maakig si Mayono hay nagaguwa dayon rong kaeayo sa anang mata. Hasta nagbinata si Mayono.
Abong mga mananakaw it hayopan ona sa andang lugar. Naka-abot sa andang baeay ro mga manakaw. Ko sang gabi-i ngaron, madueom, owa it buean. Naka-bati Si Mayono it sangag. Pagling-ling nana sa bintana, nakita nana rong mga naga-igpat-igpat nga "flashlight". Bumangon imaw. Guin paeapitan nana ro mga naga flashlight. Naga guyod rong tatlo it mga hayop. Sa anang kaakig, gumuwa rong kaeayo sa anang mata. Nasunog rong tatlo. Pagkakita ko iba, nagdaeaeagan tanan sanda. Nagkalhit sa bilog nga baryo rong kina adman ni Mayono. Umpisa kato hay guinakahadlukan eon imaw. May sa demonyo kuno imaw nga kina adman ngani dapat nga pahalinon rong pamilya ni Mayono ona sa andang baryo. Naghalin ro pamilya ni Mayono ag idto mag istar sa pihak nga baryo para matapos ro sangag.
Pagkataliwan it pilang adlaw, may isaeang ka ermitanyo nga nagpanaog sa datag. Naghambae imaw sa mga tawo ko andang pagkalipat sa Dios. Kon rong nagkasaea hay dapat nga dapatan it penalidad, ratong mga mananakaw hay dapat man maka-agum it pag pina. Suno sa ermitanyo, si Mayono hay isaeang ka sugo it Dios. Owa imaw it guinhalitan. Naga depensa imaw sa mga guina eopig ag nagabulig sa mga olipon. Tongod kara, nahuya ro mga tawo sa andang guin obra kay Mayono. Andang guin adtonan, nagdiskulpar ag convinsidong magbalik sa andang baryo.
Guin obra nanda nga kapitan it baranagay si Mayono. Nakaasawa imaw it mahugod ag mabuot. Bago namatay ro anang ina, guin sugid nana nga bukon it tunay nga onga nanda si Mayono, kundi nakita eamang sa idaeom it kahoy matapos rong pag eopok it bulkan Mayon. Si Mayono hay onga it bulkan, ag nangin bukang bibig ro anang pangaean, Mayono halin sa Bulkan nga Mayon./MP mailto:madyaas_pen@yahoo.com
No comments:
Post a Comment