Sugilanon Ni Tita Linda

Ni Tita Linda Belayro

Ro Onga It Brahman

Mabuhay eon nga owa it onga ro Brahman ag ro anang asawa. Guin sugo sanda nga mag adto idto sa ermitanyo sa ibabaw it bukid ko sangka magueang. Nag adto ro mag-asawa. Pag abot nanda, guin pangutana sanda ko ermitanyo kon ha-um sanda nga batunon maskin ano ro itsura ko andang onga. Nagpa hando sanda. Busa pagbaton hay guin pauli eon sanda. Tumaliwan ro pilang dominggo, nag nabdos ro asawa hasta nga natawo ro onga.

Ogaling duro gid ro kasubo ko Brahman tongod isaeang ka sawa ro andang onga. Bu-ot nga patyon ko Brahman, ogaling nagpakitlu-oy ro asawa nga andang diparahon tongod anda man nga onga bisan sawa ro hitsura. Nag abot ro oras nga haum ag sa edad eon nga mag asawa ro sawa. Guinbaton sa palasyo ro sawa hasta nga nangin hamtong ro anang edad sa pag asawa. Nagpabando ro hari nga kon sin-o ro makapag asawa sa anang onga, paga taw-an nana ro pamilya it manggad. Maskin mawruyon ro tug-an ko hari, owa it guinikanan nga ipasimpaead ro kabuhi ko andang onga.

Bisan ro mga guinikanan hay nahadlok, may una man nga nagkagusto. Isaeang adlaw, may isaeang ka simpleng daeaga ro nag presentar sa palasyo. Haum imaw magpakasae sa sawa. Anang bu-ot hay simple eamang ag mahipos ro kasae. Owa man imaw magpangayo it ano mang kabayaran kundi maka serbisyo sa hari ag sa anang mangin asawa. Natuman ro guin pangayo it daeaga. Guin hiwat it mahipos ro kasae. Ko gabi-e ngaron, pagkatapos it kasae, guin pakaon nanda ro anang asawang sawa. Guin trapuhan ag guin islan ro guina toeogan it sawa. Nagpahuway eon sanda. Pagkaaga, ana man nga guin paligsan, guin pakaon ag habuean sa pagtoeog. Sa sueod it sang buean, imaw nga imaw ro anang guina obra sa anang guin hinigugmang asawang sawa.

Isaeang gabi-e, matapos nanang mapakaon ag ma trapuhan ro anang asawa, nagkatoeog ro babaye. Tongod sa kaga-oy, timprano pa imaw nga nakatoeogan. Pag abot it alas dose, habatyagan nana nga may naga hulid sa anang katre. Golpe imaw nga nagbugtaw. Guin pahayag ro iwag ag hakita nana ro isaeang ka gwapuhon nga eaeaki. Nagsinggit imaw sa kahadlok. Dugang pa, basi kon makita imaw ko anang asawa nga sawa nga may kaibahan nga eaeaki sa pagkatoeog. Nagbangon ro eaeaki, naghambae nga ayaw mahadlok. Ag nagpakilaea nga imaw ro anang asawang sawa.

Imaw ro naka bungkag ko isaeang ka sumpa nga mabuhay eon nga naga gapos sa mga naga ka hikaw sa Brahman, ogaling tongod sa rondayang babaye hay simple ag haum ng ihaead ro anang kabuhi, napirde ro sumpa.

Sa kalipay ko Brahman, nagpabando imaw nga sa anang kaadlawan, may mabahoe nga sorpresa imaw nga iga pahisayod sa kaharian. Sa tunga ko engrande nga kaadlawan, guin pakilaea nana ro anang onga ag ro palangga nga umagad. Abo nga nagbatyag it kahikaw sa asawa it sawa tongod gwapuhon gali ag prinsipe pa ro anang nangin asawa.Pagkamatay ko Brahman, nangin Brahman ro anang unga ag guin dumaeahan nana it matarong ro anang sinakpan kaibahan ko anang mahugod ag mabuot nga asawa. /MP