Sugilanon Ni Tita Linda

Ni Tita Linda Belayro

Ro Baston Ni Moises

Mabuhay eon nga naduea si Moises sa anang banwa. Owa it nakakita kana kon imaw namatay o nag adto sa ibang lugar. Basta owa eon imaw makita pagkatapos nga mahilway nana ro mga Israelitas sa poder ko Paraon. Guin daea nana ro mga Israelitas sa eogta nga guin tog-an kanda.

Sa pagkahuman ko anang misyon, guin aywan nana ro mga tawo agod magdugaling. Abu eon ro mga dinag-on nga nag taliwan. Abo eon man nga nag bag-o. Ro lugar nga anang guin aywan hay nangin syudad. Makitid eon lang ro patag nga guina pahangeaban it mga karnero ag mga baka.

May isaeang ka soe-solterito, si Uzil ro anang ngaean. Isaea imaw ka bakero it mga karnero. Guina pabantayan kana ko sangka tawong may una-una ag guina bayaran ro anang serbisyo kada buean. Sa anang pagpasindong it mga karnero, may hapueot imaw nga baston sa hilamunon. Anang guin pueot. Sa anang pagpueot, habatyagan nana nga matsa may gahum imaw nga nagdapo ag nag kamang sa anang eawas ko gabii ngaron.

Tag naga pahuway eon si Uzil, may mga ilahas nga hayop nga bu-ot magsueod sa kwadra. Guin bo-oe nana ro anang baston. Pagkakita ko mga hayop sa baston, nagpaeagiw sanda tanan ag owa eon nagbalik. Umpisa kato, nangin kaibahan nana ro baston sa pagtoeog. Pagtaliwan it pilang adlaw normal ro tanan. Ogaling may gabi-e nga nagdamgo si Uzil nga may nagpakita kana nga isaeang ka magueang.

Guin dawat kana ro baston ag nagbilin pa kana nga usahon ro baston sa kamaeayran. Guin bilin pa guid kana nga depensahan nana ro mga maeoya ag ro mga guina pigos.

Si Uzil ro bag-ong Moises, sa makaron nga modernong panyempo. Paagi sa gahum ko baston, abo nga mga kaaway imaw nga maatubang. Paagi sa baston, makabulig imaw eabi guid sa mga makaeo-eo-oy ag guina pigos.
Si Uzil man ikaw? /MP